У Нацбанка няма грошай на ўтрыманне курсу рубля

Сродкі, прызначаныя для згладжвання ваганняў курсу рубля, сканчаюцца.

На мінулым тыдні валютны рынак Беларусі знаходзіўся пад уплывам выступлення Лукашэнкі ў суботу 28 верасня падчас наведвання ім Жлобіна. Яно аказалася даволі супярэчлівым. З аднаго боку, ён заявіў, што пытанне з дэвальвацыяй нацыянальнай валюты наогул сёння не стаіць. Аднак, з іншага боку, ён адзначыў, што калі будзе вялікі попыт на валюту, то будзе абясцэньвацца і беларускі рубель, піша select.by.

Акрамя таго, кіраўнік адзначыў, што Нацыянальны банк умешваецца ў працэс утварэння курсу беларускага рубля, каб не дапусціць рэзкіх ваганняў курса. Ён паведаміў, што Нацбанкам з пачатку года набыта прыкладна на 150-200 млн. USD валюты больш, чым прададзена.

Гэта азначае, што Нацыянальны банк фармальна яшчэ не траціў золатавалютныя рэзервы на падтрыманне курсу беларускага рубля, гэта значыць пакуль фармальна забарона на выкарыстанне рэзерваў для гэтых мэтаў не парушана.

Таму ўзнікае пытанне, што адбудзецца, калі Нацбанк выдаткуе тыя, што засталіся 150-200 млн. USD, і ці не стане гэта падзея падставай для пачатку больш хуткага паслаблення рубля. Мяркуючы па цяперашніх аб'ёмах попыту на валюту з боку насельніцтва і прадпрыемстваў, гэты момант павінен наступіць у кастрычніку.

На мінулым тыдні попыт на амерыканскую валюту на Беларускай валютна-фондавай біржы знізіўся, хоць і застаўся крыху вышэй сярэдняга ўзроўню. Прапанова даляраў таксама аказалася даволі значнай і ў адзін з пяці рабочых дзён нават перавысіла попыт. У сувязі з гэтым Нацыянальны банк павысіў курс даляра за тыдзень усяго на 0,3% - да 9110 BYR/USD 4 кастрычніка.

Курс еўра ў адносінах да беларускага рубля на біржавых таргах на мінулым тыдні вырас на 1,3%, гэтак жа як і курс расейскага рубля, у сувязі з паслабленнем даляра ЗША ў адносінах да гэтых валют на сусветным рынку.

На рынку міжбанкаўскіх крэдытаў сітуацыя на мінулым тыдні таксама палепшылася. Сярэдняя стаўка па крэдытах у беларускіх рублях тэрмінам на 1 дзень 3 кастрычніка апусцілася да 44,6% гадавых з 56,3% гадавых 27 верасня.

Аднак дадзеная стаўка засталіся крыху вышэй, чым у пачатку верасня, калі яна знаходзілася на ўзроўні каля 40% гадавых, гэта значыць, што гаварыць пра кардынальнае паляпшэнне сітуацыі пакуль не прыходзіцца.