У Емене расстралялі беларускіх ваенных (Відэа)

(абноўлена - 16.10) Адзін беларус забіты, другі паранены і знаходзіцца ў цяжкім стане.

У аўторак у сталіцы Емена Сане грамадзяне Беларусі падвергліся ўзброенаму нападу, адзін з іх забіты, другі - паранены.

Пра гэта заявілі ў амбасадзе Расеі ў Емене.

«У 9:15 раніцы пры выхадзе з гасцініцы «Амстэрдам» у цэнтры Саны падвергліся ўзброенаму нападу двое грамадзян Беларусі, якія працавалі ў Емене па прыватным кантракце», - сказаў «Інтэрфаксу» прэс-аташэ расейскай дыпмісіі Мікалай Лягушын.

«Пры гэтым адзін з іх быў забіты, другі - цяжка паранены», - дадаў суразмоўца агенцтва.

Раней у мясцовых СМІ праходзілі паведамленні, што людзі, якія падвергліся абстрэлу, маюць расейскае грамадзянства.

У сваю чаргу афіцыйны прадстаўнік міністэрства ўнутраных спраў Емена палкоўнік Махамед аль-Маўры паведамляў, што абстраляныя замежнікі былі ваеннымі спецыялістамі, працавалі на міністэрства абароны краіны.

Міністэрства замежных спраў Беларусі пацвердзіла гібель у Емене грамадзяніна краіны і раненне яшчэ аднаго ў выніку ўзброенага нападу.

«Мы пацвярджаем, што ў Емене ў выніку інцыдэнту з ужываннем агнястрэльнай зброі пацярпелі грамадзяне Беларусі. Яны працавалі там па афіцыйным кантракце», - заявіў агенцтву начальнік упраўлення інфармацыі - прэс-сакратар МЗС Андрэй Савіных.

«У цяперашні час консульская служба звязваецца з еменскімі ўладамі для ўдакладнення ўсіх абставінаў здарэння, для аказання неабходнай дапамогі», - сказаў афіцыйны прадстаўнік знешнепалітычнага ведамства.

Імёнаў пацярпелых беларусаў МЗС не паведаміў.

Нагадаем, пра ўзброены напад у сталіцы Емена горадзе Сане на двух замежных грамадзян, якія нібыта працавалі ваеннымі дарадцамі ў адной з частак прэзідэнцкай аховы УС краіны, стала вядома сёння раніцай. Адзін замежнік загінуў на месцы ад ранення ў галаву. Паводле папярэдняй інфармацыі, гэта мужчына ва ўзросце 60-65 гадоў славянскай знешнасці. Другі пацярпелы атрымаў цяжкія раненні і быў дастаўлены ў крытычным стане ў рэанімацыю бліжэйшай бальніцы. Лекары да гэтага часу змагаюцца за яго жыццё.

Па дадзеных мясцовага МУС, агонь адкрылі людзі, якія пад'ехалі на месца злачынства і схаваліся з яго на матацыкле.

Як перадае РІА «Новости», у Емене ўжо каля тыдня працягваюцца баі паміж рознымі ўзброенымі групоўкамі, загінулі па меншай меры 55 чалавек.

Узброеныя сутыкненні паміж шыітамі групоўкі «Аль-Хусі» і йеменскімі салафітамі ў правінцыі Саада перыядычна ўспыхваюць з 2011 года. Апошняя ўспышка узброеных сутыкненняў на поўначы Емена адбываецца на агульным фоне ўскладнення сітуацыі з унутранай бяспекай у краіне. На поўдні краіны не спыняюцца тэракты баевікоў «Аль-Каіды», а пачаты пасля прыходу да ўлады ў 2012 годзе новага прэзідэнта Абд Раба Хадзі агульнанацыянальны дыялог з мэтай выпрацоўкі новай канстытуцыі краіны да гэтага часу не прывёў да якіх-небудзь станоўчых вынікаў.