«Яшчэ пару такіх законаў - і ў Беларусі будзе Майдан»
196- 17.12.2013, 18:34
- 115,171
Нават чытачы «Саўбелкі» выказваюцца супраць збору на аўто.
«Салідарнасць» даведалася, што думаюць пра збор на аўто Лявон Вольскі, Аляксандр Саладуха, кіроўца маршруткі і чытач «СБ».
Прадпрымальнік: «Сціжма чыноўнікаў зжарэ гэтыя грошы і не падавіцца»
Прадпрымальнік з Салігорску Павел ўважае збор на аўто за несправядлівы.
- Міністр фінансаў Харкавец ківае на іншыя краіны, маўляў, там таксама такі падатак ёсць. Дык у іншых краінах людзі не плацяць такія грошы за прадукты і адзенне, як у Беларусі! Калі грошай у бюджэце няма - так і скажы, а не тлумі людзям галовы.
Бізнэсовец упэўнены, паступленні ад збораў на аўто «сціжма чыноўнікаў зжарэ і не задушыцца, а дарогі лепшымі не стануць».
Кіроўца маршруткі: «Людзі перастануць тэхагляд праходзіць. Танней будзе заплаціць штраф»
- Каб яны ракам пасталі з гэты зборам, - гэта самая ласкавая лаянка з вуснаў кіроўцы маршруткі Слуцк-Менск у адказ на просьбу журналіста даць ацэнку новаму законапраекту. - Вы ж разумееце, што гэта падвойнае падаткаабкладанне. У нас жа дарогі платныя!
На думку кіроўцы, ўводзіць збор на аўто несправядліва.
- Нехта, як я, цэлы дзень за стырном, а хтосьці два-тры разы на год выедзе, каб тэхагляд прайсці і таксама павінен плаціць. Я вось думаю, людзі перастануць тэхагляд праходзіць. Танней будзе заплаціць штраф, - выказаў меркаванне суразмоўца.
Кіроўца прыватнай маршруткі прагназуе рост коштаў на квіткі, але думае, што людзі не адмовяцца ад паездак.
- Я не ведаю, што трэба зрабіць, каб наш народ пачаў пратэставаць і бараніць ад улады сваю пазіцыю, - разважае ён. - Беларусы жывуць паводле прынцыпу «мая хата з краю».
Аляксандр Саладуха: «У мяне кіроўца»
У свой час актыўна падтрымаўшы падатак на дармаедства Аляксандр Саладуха, пачуўшы пра прыняты дэпутатамі збор на аўто, скорагаворкай выпаліў:
- Я сам за стырном не езджу. У мяне кіроўца. Я жыву маімі канцэртамі на «Менск-Арэне» 8 сакавіка. Мне няма калі...
Пасля гэтай прамовы кароль беларускай эстрады адключыўся.
Лявон Вольскі: «Не перастаю здзіўляцца бясконцаму ідыятызму ўлады»
А вось Лявон Вольскі не стаў хаваць сваё меркаванне аб уведзеным зборы:
- Народ пачынаюць біць па самых балючых месцах. Бо аўтамабіль, тэлефон, тэлевізар - у нашым грамадстве, дзе спажыванне прыраўнялі да рэлігіі - гэта святое. Таму яшчэ пара такіх законаў - і будзе Майдан і рэвалюцыя. Асабіста я пакуль не ведаю, як рэагаваць на гэты абсурд. Думаю. І ўсё не перастаю здзіўляцца бясконцаму ідыятызм улады.
Чытач «СБ»: «Я супраць сацыяльнай несправядлівасці»
У пошуках альтэрнатыўнага меркавання карэспандэнт «Салідарнасці» зазірнула на сайт «самай масавай газеты краіны» - выдання «Беларусь сегодня». У раздзеле «Прыёмная галоўнага рэдактара» апошняе паведамленне пакінуў чытач Барыс Васільевіч Бальшакоў.
- Я ўжо прагаласаваў за ліст міністру фінансаў аб скасаванні (адкліканні) новага падатку на аўто, - піша ён. - Прычына - у недастатковай прапрацоўцы гэтага праекта. Я не супраць добрых дарог, але я супраць падвойнага (трайнога) падаткаабкладання. Я супраць сацыяльнай несправядлівасці. Мы ездзім не аднолькава, хтосьці раз, два ў месяц, іншыя практычна ўвесь час.
Я пенсіянер, езджу ў асноўным толькі на лецішча, ды і то ў сувязі з дарагавізнай на бензін, апошнім часам стаў часцей карыстацца грамадскім транспартам...
За год прабег не перасягае 2-3 тысячы кіламетраў. Яшчэ паўдзесятка гадоў таму ён быў больш за 30 тысяч км. Я люблю рыбалку, таму самаход у мяне «Субару», поўнай масай (у гружаным стане, як запісана ў праекце закона) 2060 кг. Чаму распрацоўнікі праекта мяркуюць, што я заўсёды езджу загружаным пад завязку? 900 тысяч рублёў для мяне сур'ёзная сума. Дадайце сюды плату за гараж, страхоўку, тэхагляд - вось вам ужо і два мільёны. І ўсё гэта абкладзена падаткамі. Нават на дзяржаўны збор (тэхагляд) - ПДВ 20%...
Як бачым, прыхільнікаў законапраекта, занесенага ад імя Лукашэнкі і прынятага дэпутатамі, цяжка знайсці нават сярод чытачоў дзяржвыданняў! Тым часам, на сайце change.org сабрана амаль 64 тысячы подпісаў за скасаванне збору на аўто.