У Жыткавічах хуліганы размахвалі бензапіламі ў рэстаране
19- 18.12.2013, 12:13
- 17,427
Двое жыхароў Жыткавічаў зладзілі п'яны дэбош у мясцовым рэстаране «Белая Русь».
«Жыткавіцкім раённым аддзелам Следчага камітэта Беларусі распачатая крымінальная справа ў дачыненні да двух жыхароў райцэнтра 1985 г.н. і 1979 г.н., якія падазраюцца ў здзяйсненні злоснага хуліганства», - паведаміла агенцтву «Інтэрфакс-Захад» у сераду афіцыйны прадстаўнік упраўлення СК па Гомельскай вобласці Марыя Крываногава.
«17 снежня падазраваныя, знаходзячыся ў стане алкагольнага ап'янення, у зале рэстарана «Белая Русь» размахвалі перад наведвальнікамі заведзенымі бензапіламі. Пасля таго, як афіцыянт патэлефанавала ў міліцыю, парушальнікі грамадскага парадку пакінулі ўстанову», - распавяла Крываногава.
«Неўзабаве яны былі затрыманыя супрацоўнікамі Жыткавіцкага РАУС, якія ўваходзілі ў склад следча-аператыўнай групы, сумесна з супрацоўнікамі палка патрульна-паставой службы міліцыі УУС Гомельскага аблвыканкама», - праінфармавала яна.
Пры аглядзе месца здарэння, працягнула Крываногава, «на першым паверсе будынка рэстарана на дзвярах, якія вядуць на лесвічны пралёт, былі выяўленыя палосавідныя пашкоджанні, характэрныя для ўздзеяння бензапілы».
«Падазраваныя затрыманыя і змешчаныя ў ІЧУ Жыткавіцкага РАУС. Пры правядзенні першапачатковых следчых дзеянняў матывы сваіх супрацьпраўных паводзінаў патлумачыць адмовіліся», - паведаміла прадстаўнік СК.