Алігарх Чыж спрабуе абысці санкцыі ЕЗ

«Кашалёк» Лукашэнкі задумаў маштабную рэарганізацыю свайго бізнесу.

Першым крокам стала перадача рэстарана «Ракаўскі бровар», які знаходзіцца пад санкцыямі ЕЗ, бізнесмену Паўлу Палонскаму. Ад яшчэ адной кампаніі, у дачыненні да якой дзейнічаюць абмежавальныя меры, «Трайпл Тэхна», Юрый Чыж адмовіўся раней.

Адначасова з «Ракаўскім броварам», які быў адкрыты ў 1997 годзе, ва ўпраўленне Паўлу Палонскаму адышоў таксама і рэстаран «У Францыска». Гэтую інфармацыю пацвердзілі некалькі крыніц на рынку. Акрамя таго, гэтыя дзве ўстановы ўключаныя ў дысконтную праграму «Шакалад», якая дзейнічае ва ўсіх рэстаранах Паўла Палонскага. Гэтая інфармацыя размешчаная на сайце групы яго рэстаранаў, піша «Ежедневник».

Палонскі лічыцца адным з самых паспяховых беларускіх рэстаратараў, а пачынаў ён бізнес у 1993 годзе з куплі франшызы «Докі-піцы» ва Уладзіміра Доўганя. Зараз Палонскі з'яўляецца саўладальнікам і кіраўнікам групы рэстаранаў і кафэ, сярод якіх «Эль Памідора», «Тэрыторыя», «Сем комнат», «Старое русла». Па некаторай інфармацыі, ва ўпраўленне Палонскаму ўжо перайшлі або могуць перайсці ў бліжэйшы час і тры кандытарскія «Салодкi фальварак», уладальнікам якіх з'яўляецца «Трайпл».

Адзначым, што каля месяца таму з'явілася інфармацыя, што адна з гэтых кандытарскіх выстаўленая на таргі разам з рэстаранам «Бухара», які таксама належыць Чыжу. За іх просяць звыш 2 млн. даляраў. Трэба сказаць, што ў бягучым годзе Юрый Чыж пазбавіўся ад яшчэ аднаго рэстарана, а таксама гасцініцы ў Мірскім замку. Яны былі перададзеныя дзяржаве на бязвыплатнай аснове.

Перадача ў кіраванне або продаж рэстаранаў - гэта не першы і, мяркуючы па ўсім, не апошні крок вядомага бізнесмена на шляху рэструктурызацыі свайго шматпрофільнага бізнеса. У 2011 годзе ён ліквідаваў кампанію «Трайпл-тэхна», якая разам з «Менскімі вокнамі» Івана Буракоўскага ўтварыла новую бізнес-структуру - «Менскі дом вокнаў». Цікава, што на працягу многіх гадоў «Трайпл-тэхна» ўзначальваў Сяргей Зелянко. Чыж знаёмы з ім яшчэ з часоў Беларускага біржавога банка, дзе бізнесмен быў адным з ключавых акцыянераў, а Зелянко - членам праўлення. Пасля краху банка Зелянко перайшоў у «Трайпл», а пасля закрыцця «Трайпл-тэхна» зноў вярнуўся ў банкаўскі бізнес. Зараз Зелянко - намеснік старшыні праўлення БелЗЭБа.

У апошнія меясцы на рынку таксама з'явілася інфармацыя, што Чыж страціў цікавасць да мясаперапрацоўкі і шукае пакупніка на завод «Трайпл-Вялес». Але яна не знайшла пацверджання.

Зрэшты, у холдынгу бізнесмена каля 15 напрамкаў, з якіх заўсёды можна абраць прыярытэты. Адным з іх, падобна, стала сталічная гасцінічная нерухомасць. Некалькі тыдняў таму па адрасе цэнтральнага офіса «Трайпла» на Пераможцаў 51/2 было зарэгістравана СТАА «Кей Эм Лакшаыи Хатэл», якое, хутчэй за ўсё, з'яўляецца сумеснай кіруючай кампаніяй будучага гатэля Kempinski у цэнтры Менска.

Санкцыі ЕЗ уведзеныя ў дачыненні да 18 фірмаў алігарха Юрыя Чыжа з-за падтрымкі ім рэпрэсій, якія праводзяцца беларускімі ўладамі ў дачыненні да апазіцыі. Яны пачалі дзейнічаць у 2011 годзе і падоўжаныя восенню 2013 года. Санкцыі ўведзеныя ў дачыненні да ТАА «Трайпл», СТАА «НафтаХімТрэйдынг», ЗАТ «Аскаргатэрмінал», ТАА «Трайплметалтрэйд», ТАА «Бярозаўскі камбінат сілікатных вырабаў», СП ТАА «Трайпл-Тэхна», СТАА «Варыянт», СТАА «Трайпл-Дэкор», СЗАТ «Кварцмелпрам», СЗАТ «Альтэрсалюшнс», СЗАТ «Прастормаркет», СП ТАА «Акватрайпл», ТАА «Ракаўскі бровар», ГСАК «Лагойск», «Трайпл-Агра», ЗАТ ФК «Дынама-Менск», СТАА «Трайплфарм», ЗАТ «Трайплфарм».