Ва Украіне пачаўся «Ленінапавал»

Ва Украіне зносяць помнікі Леніну. Паведамленні пра выпадкі санкцыянаванага і самавольнага разбурэння манументаў з'яўляліся ў лютым кожны тыдзень.

На поўдні Украіны, у Херсоне 7 лютага невядомыя разбурылі помнік Леніну. 15 лютага на паўночным усходзе краіны, у 60 кіламетрах ад мяжы з Расеяй, у горадзе Ахтырка Сумскай вобласці група народных дэпутатаў Усеўкраінскага аб'яднання «Свабода» разам са сваімі прыхільнікамі сярод белага дня дэмантавалі помнік галоўнаму бальшавіку. Праўда, праз тыдзень камуністы паспрабавалі яго аднавіць. Абодва працэсы суправаджаліся сутыкненнямі з паліцыяй з ужываннем фізічнай сілы і слезацечнага газу, перадае Deutsche Welle.

На паўночным захадзе краіны, у Жытомірскай вобласці ў горадзе Наваград-Валынскім мясцовыя ўлады па прапанове прыхільнікаў «Свабоды» пагадзіліся прыбраць помнік пралетарскаму правадыру з цэнтральнай плошчы.

23 лютага ў цэнтральнай Украіне МУС зафіксавала яшчэ адно правапарушэнне, якое падпадае пад частку 1 артыкула 256 КК Украіны «Хуліганства». У вёсцы Кастрычніцкае Палтаўскай вобласці ноччу невядомыя абезгаловілі помнікі Леніну і яго жонцы Надзеі Крупскай.

На Захадзе ніводнага, на Усходзе тысячы «безгаспадарных»

У «Свабодзе» не хаваюць, што «ахтырскі Ленін» будзе не апошнім разбураным помнікам правадыру сусветнага пралетарыяту. Партыя нават рыхтуе законапраект, які, па словах народнага дэпутата Ігара Швайко, стане юрыдычнай падставай «канчатковага вызвалення краіны ад савецкіх ідалаў». «Мы аднаўляем гістарычную справядлівасць. Ленін быў заснавальнікам бальшавіцкай акупацыі Украіны», - заявіў дэпутат карэспандэнту DW.

Лідэр цярнопальскіх камуністаў Васіль Паразінскі лічыць, што прыхільнікі «Свабоды» працягваюць «ачарняць савецкую гісторыю». «У Івана-Франкоўскай, Цярнопальскай і Львоўскай абласцях вы не знойдзеце ніводнага помніка Леніну. Камуністы Цярнопаля ў памятныя даты сустракаюцца каля помнікаў у суседняй Хмяльніцкай вобласці», - паскардзіўся ён DW.

На ўсходзе, поўдні і ў цэнтральнай частцы Украіны захавалася, па розных ацэнках, ад 1000 да 2500 тысяч помнікаў галоўнаму бальшавіку. Але, як кажа народны дэпутат ад Камуністычнай партыі Украіны (КПУ) Вольга Леўчанка, мясцовыя ўлады насуперак закону «Аб ахове культурнай спадчыны» помнікі не ахоўваюць і не клапоцяцца пра іх.

У многіх выпадках гэта звязана з тым, што ў дзяржрэестр трапілі не ўсе помнікі савецкага перыяду. «Значыць, юрыдычна няма падстаў і для бюджэтнага фінансавання, і, дарэчы, няма падстаў і для прыцягнення да адказнасці за іх разбурэнне», - кажа Леўчанка. У партыі «Свабода» не хаваюць, што менавіта «безгаспадарныя Леніны» пацерпяць у першую чаргу.

Помнікі - не справа палітыкаў

Гарачыя палітычныя дэбаты пра лёс помнікаў Леніну ідуць і ў Сетцы. Гэта адна з тэм, якія абмяркоўваюцца на шматлікіх гарадскіх форумах і ў сацыяльных сетках. Гучаць розныя прапановы: зносіць, не зносіць, правесці рэферэндум. Так, харкаўскі пенсіянер-прадпрымальнік Уладзімір Лянівы ўжо шмат гадоў калекцыянуе помнікі савецкім правадырам. Усе экспанаты выстаўленыя ў двары яго майстэрні.

Да «Леніну працы савецкіх аўтараў» у яго стаўленне не палітычнае: «Я бачыў не так шмат асобнікаў, якія прадстаўляюць сапраўдную мастацкую каштоўнасць. Паспрабуйце знайсці скульптуры, падобныя, так бы мовіць з арыгіналам, каб была адлюстраваная менавіта яго міміка, яго касавокасць. Такія рабілі толькі ў 20-х гадах». Таму пенсіянер прапануе дзяржаве падысці да пытання прафесійна. Адправіць на звалку рэальны хлам, а гістарычныя помнікі, каштоўнасць якіх павінны пацвердзіць эксперты, захаваць.