Русы «спаць нікому не дасць»
37- 27.03.2013, 13:14
Намеснік прэм'ер-міністра Беларусі Міхаіл Русы ўпэўнены, што, нягледзячы на зіму, якая зацягнулася, пасяўныя работы будуць праведзеныя ў тэрмін.
«Усё будзе зроблена ў тэрмін, такая задача пастаўлена. Спаць нікому не дамо, нам трэба на высокім арганізацыйным узроўні правесці гэтую працу», - заявіў віцэ-прэм'ер урада журналістам у сераду ў Менску, піша «Інтэрфакс».
«Два мільёна га ранніх яравых за 10-12 дзён мы павінны пасеяць», - сказаў Русы.
Паводле яго слоў, «тэхніка ў нас гатова, мінеральных угнаенняў нарыхтавана на ўзроўні мінулага года, насення дастаткова, вызначаныя крыніцы фінансавання, прыступілі да вырабу біядызелю».
«Мяркую, што прыгатуем 550-600 тысяч тон біядызелю, ён для сялян абыйдзецца танней», - адзначыў віцэ-прэм'ер урада.
Нагадаем, у сакавіку гэтага года ў Любанскім раёне знайшлі 130 гектараў непрыбранай з восені кукурузы.
Фота: zil.mogved.by