АМАП патрабаваў у заўзятараў зняць майкі з надпісам «Мы моцныя беларусы»

Брэсцкія заўзятары паскардзіліся ў Федэрацыю футбола на менскі АМАП.

«Выезд заўзятараў ФК «Дынама-Брэст» на чвэрцьфінальную гульню Кубка Рэспублікі Беларусь па футболе ў чарговы раз быў азмрочаны некампетэнтнымі, а часцяком і адкрыта хамскімі паводзінамі супрацоўнікаў менскага АМАПу, - гаворыцца ў заяве, апублікаванай на сайце ФК «Дынама-Брэст». - Пры ўваходзе на сектар, прызначаны для брэсцкіх заўзятараў, быў арганізаваны надгляд, пры гэтым большасць прыхільнікаў футбола вымушаныя былі чакаць сваёй чаргі на вуліцы, у мінусавое надвор'е. Мала таго, сама працэдура надгляду выглядала зневажальна і хутчэй нагадвала ператрус з прыхільнасцю - трыбушэнне рэчаў, выварочванне кішэняў, якое суправаджалася фамільярным, а перыядычна адкрыта выклікаючым зваротам да заўзятараў».

АМАП загадаў заўзятарам зняць майкі з надпісамі «Мы не бухiя бульбашы! Мы моцныя беларусы!».

«Ужо звыклыя для заўзятараў грубыя паводзіны на гэты раз былі дапоўненыя новымі элементамі. Так, у прыватнасці, без тлумачэння прычын, на сектар не быў дазволены пранос банэра, які быў у рэестры - «Дынама Брэст ад калыскi да пагоста з iмем, якое нiхто не адыме». Рэакцыя на абурэнне незаконнымі дзеяннямі супрацоўнікаў АМАП апынулася прадказальнай - «вось у Брэсце са сваім рэестрам і пранасіце». Яшчэ больш дзікім фактам стала вылучанае заўзятарам патрабаванне зняць майкі з надпісамі «Мы не бухiя бульбашы! Мы моцныя беларусы!», «Дынама Брэст - мой гонар, маё жыццё, усё што кахаю i чым ганаруся». Спадзяемся, прычынамі гэтых забаронаў стала ваяўнічае невуцтва супрацоўнікаў АМАПу, а не паталагічная нянавісць да роднай мовы», - гаворыцца ў заяве.

«Названыя факты, а таксама канфліктныя сітуацыі, якія ўзнікалі падчас іншых матчаў, якія праводзіліся 17 сакавіка ў сталічным футбольным манежы, у чарговы раз сведчаць аб неабходнасці перагляду прынцыпаў арганізацыі працы па забеспячэнні бяспекі на спартыўных спаборніцтвах, якія праводзяцца пад эгідай АБФФ.

Цалкам відавочна, што цывілізаванасць балення ў апошні час значна апярэджвае ўзровень цывілізаванасці арганізацыі спартыўных мерапрыемстваў. На жаль, для пераважнай большасці амапаўцаў, мяркуючы па іх паводзінах, загад МУС N1 «Аб ветлівым і ўважлівым стаўленні супрацоўнікаў органаў унутраных спраў і ваеннаслужачых унутраных войскаў да грамадзян» не з'яўляецца нарматыўным дакументам, не кажучы ўжо пра такія тонкія матэрыі, як звычайная ветлівасць і праява павагі да сваіх суграмадзян.

Арганізацыя дагляду супрацоўнікамі АМАПу, а таксама іх прысутнасць на сектары з актыўнымі заўзятарамі пры існуючым з боку «ахоўнікаў парадку» перадузятае стаўленне да заўзятараў, як да злачынцаў-рэцыдывістаў, вядзе да стварэння канфліктных сітуацый і дыскрэдытацыі праваахоўных органаў. Цалкам відавочна, што супрацоўнікі АМАПу (атрада міліцыі спецыяльнага прызначэння) павінны вырашаць абсалютна іншыя задачы - прадухіленне масавых беспарадкаў, супрацьстаянне арганізаваным злачынным групам і інш, але не дагляд балельшчыкаў на футбольных матчах і вызначэнне «легітымнасці» банэраў, шалікаў і іншай балельшчыцкай атрыбутыкі.

Для забеспячэння бяспечных і ў той жа час камфортных умоў на трыбунах падчас правядзення футбольных матчаў, стварэння на сектары добразычлівай атмасферы, гэтую функцыю безумоўна павінны выконваць арганізаваныя клубамі (Федэрацыяй) службы бяспекі, так званыя сцюарды. На пераходным этапе лічым дапушчальным ускладанне такіх абавязкаў на падраздзяленні Міністэрства ўнутраных спраў, якія не адносяцца да ліку спецыяльных», - падкрэсліваюць заўзятары.

Заўзятары спадзяюцца, што рашэнне вышэйазначаных праблем не абмяжуецца чарговай дзяжурнай нарадай, дамоўленасці якой будуць праз некалькі дзён парушаныя супрацоўнікамі, якія забяспечваюць бяспеку правядзення спартыўных мерапрыемстваў, а прыме формы арганізаванай, паслядоўнай кампаніі.