Кіпр абмежаваў вываз валюты з краіны

Кіпр увёў абмежаванні на ўнутраныя аперацыі і вываз гатовых грошай з краіны.

Абмежаванні будуць дзейнічаць з чацвярга, 28 сакавіка, калі адчыняцца мясцовыя банкі, піша lenta.ru.

Фізічным асобам забаранілі браць з сабой пры выездзе за мяжу больш за тры тысячы еўра. Улады краіны таксама забаранілі датэрміновае скасаванне дэпазітных кантрактаў, а трансакцыі на крэдытных картках абмежаваныя пяццю тысячамі еўра ў месяц. Акрамя таго, мясцовым кампаніям дазволена расплачвацца за імпартныя пастаўкі, даражэйшыя за 500 еўра, толькі пры паказе пацвярджальных дакументаў.

Абмежаванні будуць дзейнічаць цягам сямі дзён.

Захады, уведзеныя Кіпрам, павінны спыніць адток капіталу з банкаў краіны. Асцярогі, што кампаніі і фізічныя асобы будуць выводзіць сродкі з выспы, звязаныя з планамі краіны правесці рэструктурызацыю банкаў. У рамках рэструктурызацыі дэпазіты да 100 тысяч еўра не зазнаюць аніякіх страт, а з больш буйных рахункаў можа быць спісаная частка сродкаў.

27 сакавіка міністр фінансаў Кіпра Міхаліс Сарыс (Michalis Sarris) заявіў, што з буйных рахункаў, адкрытых у другім памерам кіпрскім банку Cyprus Popular Bank (Laiki Bank), можа быць спісана да 80 адсоткаў.

Пастанова аб абмежаванні руху капіталаў была прынятая ў выніку перамоў кіпрскіх улад з міністрамі краін еўразоны 26 сакавіка, але дэталі не былі вядомыя. Тады ўлады валютнага блока ўхвалілі Кіпру стабілізацыйны крэдыт у суме 10 мільярдаў еўра. У сваю чаргу, Нікасія пагадзілася на рэструктурызацыю банкаў.

Банкі Кіпра зачыненыя з 16 сакавіка, калі з'явіліся першыя паведамленні аб зборы з рахункаў, размешчаных на выспе. Першапачаткова меркавалася, што пад дзеянне збору трапяць усе чыста ўклады, але пасля таго, як такі варыянт выратавання краіны адмовіўся ўхваляць парламент, была прынятая пастанова аб выключэнні з-пад дзеяння закона ўкладаў да 100 тысяч еўра.