КНДР разрывае ўсе пакты аб ненападзенні
79- 8.03.2013, 10:07
Паўночная Карэя абвясціла пра разрыў усіх пагадненняў аб ненападзенні з Паўднёвай Карэяй, закрыццё гарачай лініі сувязі з Сеулам і закрыццё мяжы паміж дзвюма краінамі.
Гэты крок Пхеньяна рушыў услед за новым раўндам санкцый, уведзеных ААН у спробе ўтаймаваць паўночнакарэйскую ядзерную праграму, перадае ВВС.
Санкцыі сталі адказам на лютаўскае ядзернае выпрабаванне ў КНДР.
У адказ на гэта Пхеньян прыгразіў скарыстацца сваім правам на папераджальны ядзерны ўдар.
Апошняя заява КНДР, распаўсюджаная дзяржаўным інфармацыйным агенцтвам, абвяшчае, што Поўнач адмяняе ўсе дамоўленасці аб ненападзенні, заключаныя з Поўднем, і закрывае памежны пункт Панмунджом у дэмілітарызаванай зоне, якая падзяляе часткі Карэйскай паўвыспы.
Агенцтва таксама паведаміла, што паўночнакарэйскі лідэр Кім Чэн Ын наведаў франтавыя воінскія часткі, якія ўдзельнічалі ў абстрэле паўднёвакарэйскай выспы ў 2010 годзе.
Кім даў наказ байцам быць гатовымі «знішчыць ворага» ў любы час і пацвердзіў так званыя «варожыя мэты» на пяці выспах на захад ад паўвострава.
Рэзалюцыя 2094, якая прадугледжвае ўжо чацвёрты пакет санкцый у дачыненні да Пхеньяна, была прынятая Радай Бяспекі ААН аднагалосна.
Яна закранае паўночнакарэйскіх дыпламатаў, грашовыя пераводы і доступ да прадметаў раскошы.
Таксама ўводзіцца забарона на выдачу віз тром паўночнакарэйскім службовым асобам і замарожваюцца актывы гэтых людзей, а таксама двух кампаній, звязаных з войскам Паўночнай Карэі.
Прадстаўнік ЗША пры ААН Сюзан Райс заявіла, што рэзалюцыя «рашуча асуджае» дзеянні КНДР, а санкцыі «дадаткова абмяжуюць» магчымасці Пхеньяна развіваць яго ядзерную праграму.
У выпадку новых ядзерных выпрабаванняў ААН распачне дадатковыя дзеянні ў адказ, папярэдзіла Райс.
Прадстаўнік МЗС Кітая Цынь Ган вітаў рэзалюцыю ААН і назваў яе «ўмеранай мерай у адказ».
Пекін заклікаў усе бакі захоўваць спакой і «ўстрымлівацца ад дзеянняў, здольных прывесці да эскалацыі напружанасці».
Да галасавання Паўночная Карэя вінаваціла ЗША ў развязванні вайны.
«Да таго часу, пакуль Злучаныя Штаты гатовыя распаліць ядзерную вайну, нашыя войскі будуць карыстацца сваім права на папераджальны ядзерны ўдар», - гаварылася ў заяве паўночнакарэйскага МЗС.