На «Пінскдрэве» хочуць стварыць незалежны прафсаюз

Кіраўніцтва холдынгу заклікае рабочых адклікаць свае заявы аб выхадзе з афіцыйнага прафсаюзу, пагражаючы, што нязгодных чакае лёс актывістаў «Граніту».

Як стала вядома charter97.org, аб жаданні выйсці з вочка Федэрацыі прафсаюзаў Беларусі (ФПБ) заявілі каля паўсотні рабочых прадпрыемства «Пінскдрэў-Адрыяна», якое ўваходзіць у склад холдынгу «Пінскдрэў». Прычынай такога дэмаршу стала, па словах рабочых, бяздзейнасць мясцовай арганізацыі ФПБ. Пры гэтым нейкіх сацыяльных патрабаванняў не вылучаецца: проста працаўнікі «Пінскдрэва» не бачаць сэнсу заставацца ў такім прафсаюзе, называючы яго бюракратычнай структурай.

Тым не менш, адміністрацыя холдынгу вельмі сур'ёзна паставілася да намераў рабочых пакінуць шэрагі ФПБ і запатрабавала ад «бунтаўшчыкоў» адклікаць свае заявы. У іншым выпадку ім прыгразілі паўторам сітуацыі на мікашэвіцкім прадпрыемстве «Граніт», дзе практычна ўсіх актывістаў створанага незалежнага прафсаюзу звольнілі з працы.

Як паведаміў карэспандэнту charter97.org лідар суполкі Беларускага незалежнага прафсаюзу на РУВП «Граніт» Алег Стахаевіч, яго не здзіўляе, што на іншых прадпрыемствах рабочых спрабуюць запалохаць прыкладам таго, як расправіліся з актывістамі прафсаюзнага руху ў Мікашэвічах. «Аднак на самай справе рабочыя «Граніту»выдатна разумеюць, што цяперашняга ўзроўню аплаты сваёй працы, калі заробкі складаюць 15-17 мільёнаў рублёў, яны дамагліся дзякуючы дзейнасці незалежнага прафсаюза, які рэальна абараняе інтарэсы рабочых, - лічыць Стахаевіч. - Таму прыклад «Граніту» лішні раз даказвае, як трэба змагацца за свае правы».