На жыхароў інтэрнатаў «павесяць» аплату капрамонту

Жыхары інтэрнатаў у Беларусі будуць часткова аплачваць капрамонт.

Такое новаўвядзенне прадугледжана пастановай Саўміна «Аб зацвярджэнні Палажэння аб інтэрнатах і тыпавой дамове найму жылога памяшкання дзяржаўнага жыллёвага фонду ў інтэрнаце і прызнанні страціўшымі сілу некаторых пастаноў Савета міністраў», піша БелТА.

У палажэнні гаворыцца, што капітальны рамонт інтэрната будзе рабіцца за кошт дзяржаўнай арганізацыі і іншых крыніц, не забароненых заканадаўствам, а таксама за кошт сродкаў, якія паступаюць ад платы за капітальны рамонт, што ажыццяўляецца наймальнікамі жылых памяшканняў. Раней жыхары інтэрнатаў не ўносілі плату за правядзенне гэтых відаў рамонтных работ.

Жыхары будуць плаціць за такія працы, як пабел, афарбоўка або абклейванне шпалерамі сцен, афарбоўка радыятараў, вокнаў, падваконнікаў, дзвярэй, убудаваных шафаў і антрэсоляў, устаўка шкла, афарбоўка або пакрыццё лакам падлог у пакоях інтэрнатаў, якія знаходзяцца ў адасобленым валоданні і карыстанні сем'яў.

Дакументам таксама ўнесеныя змены ў парадак высялення наймальнікаў і членаў іх сем'яў з інтэрната.

«Раней чалавек, які адпрацаваў на прадпрыемстве ці ў арганізацыі, у інтэрнаце якога пражываў 10 гадоў, меў права карыстацца гэтым жылым памяшканнем, яго нельга было выселіць без прадастаўлення іншага жылля. Зараз усе асобы без выключэння, у тым ліку з дзецьмі, будуць падлягаць высяленню пасля спынення працоўных адносін», - растлумачылі ў Мінжылкамгасе.