Беларусь патрабуе ад Расеі, каб для ўкраінцаў увялі візы

Расея можа ўвесці візы для грамадзян краін, якія не з'яўляюцца чальцамі Мытнага саюза.

Пра гэта заявіў вядомы расейскі палітолаг, які курыруе ўкраінскі кірунак у Інстытуце краін СНД, Уладзімір Жарыхін.

«Гэта можа стаць рэальнасцю. З аднаго боку, Расея быццам бы нарошчвае цягліцы, уключыўшы ў сваю эканамічную сферу Казахстан і Беларусь, але з іншага - краіна абменьвае на інтэграцыю свой суверэнітэт. У кожнай арганізацыі частка суверэнітэту аддаецца, і Расея таксама аддала сваю частку. Вы думаеце, беларусы і казахі не ціснуць на Расею з патрабаваннямі, каб для грамадзян Мытнага Саюза былі адны ўмовы прысутнасці на расейскім рынку, а для астатніх - іншыя? Патрабуюць і ціснуць», - цытуюць палітолага «Известия».

Ён кіўнуў, што гэта Беларусь патрабуе, каб для ўкраінцаў увялі візы. «І яны маюць рацыю. Калі яны ахвяравалі частку свайго суверэнітэту ў агульную скарбонку, то пры гэтым павінны мець перавагу над тымі, хто гэтага не зрабіў. У тым ліку, і ў аспекце свабоды на рынку працы. Таму тое, што Пуцін сказаў, - не пострах, - заявіў Жарыхін.

Экспэрт адзначыў, што ўкраінскія гастарбайтэры ў Расеі - у дыскрымінацыйным становішчы. «У дачыненні да грамадзян Беларусі яны ўжо з'яўляюцца дыскрымінаванымі. Таму што ніякіх квот, дазволаў і падатковых выключэнняў для грамадзян Беларусі няма. Яны могуць прыязджаць у Расею і працаваць абсалютна свабодна, як, зрэшты, і грамадзяне Расеі ў Беларусі», - распавядае палітолаг.

Ён адмаўляе, што ў Маскве збіраюцца ўводзіць візавы рэжым для барацьбы з мігрантамі, аднак прагназуе, што ў Расею замежнікаў будуць пускаць толькі з замежнымі пашпартамі.

«Думаю, што ўсё ж бліжэйшымі гадамі ўвядуць тое, пра што казаў Пуцін, - бязвізавае перасячэнне мяжы, але ўсё ж такі з замежным пашпартам. І вам, і нам ад гэтага лягчэй будзе. Асабіста ў нас з вамі, можа, ніякіх нязручнасцяў гэта не выкліча, але ў 83% жыхароў Расеі і прыкладна такой жа колькасці жыхароў Украіны няма замежных пашпартоў», - заявіў ён.

Разам з тым, ён прагназуе, што ўвядзенне ўезду з замежным пашпартам не развяжа праблему мігрантаў з Азіі.

«Інакш з гэтымі хлопцамі з Цэнтральнай Азіі, і вы, напэўна, таксама ўжо пачынаеце з гэтым сутыкацца, парадак навесці немагчыма. Яго дэпартуюць, ён тут жа новую ксіву робіць у сваім сельскім аддзяленні міліцыі і едзе сюды зноў пад новым імем і прозвішчам», - заявіў Жарыхін.