За штурм беларускай мяжы расейцу далі 4 гады калоніі
29- 19.04.2013, 17:55
Да 4 гадоў пазбаўлення волі ў папраўчай калоніі ва ўмовах узмоцненага рэжыму асуджаны 23-гадовы грамадзянін Расеі, які на аўтамабілі «БМВ» незаконна перасёк дзяржаўную мяжу Беларусі.
Прысуд яму вынес 19 красавіка суд Брэсцкага раёна.
Як паведаміў БелаПАН Аляксандр Плышэўскі, які падтрымаў дзяржаўнае абвінавачванне па справе, расеец, які доўгі час пражывае ў Германіі, 21 студзеня 2013 года ў аўтадарожным пункце пропуску «Дамачова» ў парушэнне ўстаноўленага парадку праходжання мытнага і памежнага кантролю незаконна перасёк мяжу на аўтамабілі «БМВ».
«Кіруючы ім на вялікай хуткасці, ствараючы рэальную небяспеку жыццю і здароўю людзей, якія знаходзіліся ў пункце пропуску, малады чалавек наўмысна пашкодзіў чатыры шлагбаўма, знішчыў яшчэ адзін камплект шлагбаўма, якія знаходзяцца на балансе Брэсцкай мытні. Пасля чаго схаваўся», - паведаміў Плышэўскі.
22 студзеня расеец і «БМВ» былі выяўленыя ў адным з сельскіх населеных пунктаў Брэсцкага раёна. Маладога чалавека затрымалі. 25 студзеня ў дачыненні да яго была абраная мера стрымання ў выглядзе заключэння пад варту.
Разам з коштам работ па замене і аднаўленню пашкоджанай і знішчанай маёмасці абвінавачаны прычыніў мытні шкоду, якая ацэненая ў 29 млн. 747 тыс. 393 рублі. Гэтая сума была кампенсаваная ім у поўным аб'ёме ў ходзе разгляду справы ў судзе.
Тым не менш суд прызнаў расейца вінаватым па ч. 1 арт. 371 (наўмыснае незаконнае перасячэнне дзяржаўнай мяжы Рэспублікі Беларусь з выкарыстаннем механічнага транспартнага сродку) і ч. 2 арт. 218 (наўмыснае знішчэнне і пашкоджанне маёмасці, здзейсненае агульнанебяспечным спосабам, якое пацягнула прычыненне шкоды ў буйным памеры) Крымінальнага кодэкса.
Як адзначыў Плышэўскі, падчас папярэдняга расследавання судовая псіхолага-псіхіятрычная экспертыза ўстанавіла, што малады чалавек «усведамляў характар сваіх дзеянняў, кіраваў імі, ва ўжыванні прымусовых мер бяспекі і лячэнні не мае патрэбы».
«У судовым пасяджэнні расеец прызнаў сваю віну цалкам і раскаяўся ў зробленым. Свае дзеянні ён патлумачыў тым, што быў засмучаны з-за страты працы ў Германіі, патрапіўшы пад скарачэнне, сваркай са сваёй дзяўчынай і маці. Са слоў абвінавачанага, ён ехаў у Расею, дзе пражывае бацька, з намерам застацца там жыць», - дапоўніў дзяржабвінаваўца.
Прысуд яшчэ не ўступіў у законную сілу і можа быць абскарджаны.
