Беларускія міліцыянты шукаюць працу ў Расеі

Услед за будаўнікамі, медыкамі і кіроўцамі на працу ў Расею з'язджаюць і супрацоўнікі беларускай міліцыі.

І зусім не ў ролі гастарбайтэраў. Некаторыя з іх, паслужыўшы ў Беларусі, хочуць працягнуць службу ў форме расейскага паліцэйскага і ўжо абіваюць парогі кадравых службаў упраўленняў МУС РФ, пішуць «Белорусские новости».

Навялі на гэтую тэму былыя менскія аператыўнікі. Некалькі гадоў таму пасля так званага «навумаўскага» (Уладзімір Навумаў - экс-кіраўнік МУС) скарачэння яны былі вымушаныя сысці на пенсію. Звальняліся па дасягненні ўзросту і выслугі у 45 гадоў, хоць служыць хацелі: дзеці яшчэ на свае ногі не сталі, ды над кожным дамоклавым мячом віселі ўзятыя пры пагонах крэдыты на жыллё.

Сёння на пытанне, ці не жадаюць яны вярнуцца на службу, якой аддалі па дваццаць гадоў жыцця, яны дружна адказалі: «Не!». Шок ад страты працы прайшоў, былыя міліцыянты адаптаваліся да грамадзянскага жыцця, працаўладкаваліся ды і...

«Мы ведаем, што сёння адбываецца ў органах, - сказалі яны. - Якім бокам выйдзе гэтая рэформа МУС, ніхто не ведае, а таму настрой у нашых дзеючых калегаў, мякка кажучы, на нулі. Калі ўжо і служыць, то ў расейскай паліцыі, там хоць ёсць за што...».

Па іх словах, некалькі былых менскіх міліцыянтаў знайшлі магчымасць стаць расейскімі паліцыянтамі. Адзін з іх, кажуць, служыць операм у маскоўскім крымінальным вышуку, іншы - уладкаваўся экспертам-крыміналістам. Праўда, адшукаць сляды гэтых шчасліўчыкаў не ўдалося. Можа, гэта і чуткі, але факт матэрыяльнай выгады ў наяўнасці.

Справа ў тым, што з 1 студзеня 2012 года грашовае ўтрыманне супрацоўнікаў расейскіх органаў унутраных спраў значна - у 2-3 разы - узрасло. Зарплата радавога паліцэйскага-першагодка пачынаецца ад 30 тысяч расейскіх рублёў (крыху менш тысячы даляраў) плюс прэміі. Для параўнання, матэрыяльныя магчымасці начальніка РУУС Менска ў званні падпалкоўніка з выслугай 18 гадоў абмяжоўваюцца 8 млн. беларускіх рублёў (930 даляраў). Да ўсяго і так званы сацыяльны пакет у расейскага паліцэйскага выглядае, вобразна кажучы, сыцей: ад бясплатнага праезду ў грамадскім транспарце да аднаразовай сацыяльнай выплаты для набыцця або будаўніцтва кватэры. Вядома, служба, што ў беларускай міліцыі, што ў расейскай паліцыі - не цукар, прэстыжнай яе не назавеш, але ў матэрыяльным плане розніца маецца, не на карысць МУС РБ.

Характэрна, што яшчэ ў студзені мінулага года на адным з форумаў супрацоўнікаў МУС Расеі з'явіўся пост такога зместу:

«Ці можна грамадзянам Рэспублікі Беларусь праходзіць службу ў АУС Расейскай Федэрацыі? Я ў дадзены момант служу ў АУС Рэспублікі Беларусь, у АУС з 1999 года, ужо ў званні маёра? Цікавіць магчымасць аднаўлення на службе ў АУС Расейскай Федэрацыі пасля звальнення з АУС Рэспублікі Беларусь?».

Аб'ява на тэму «Хачу служыць у паліцыі» аказалася не адзінай. Некалькі дзён таму ў сацыяльных сетках даў аб сабе ведаць яшчэ адзін патэнцыйны «перабежчык»:

«У Маскве знаходжуся з мэтай паступлення на службу ў паліцыю РФ. 18 студзеня г.г. звольніўся з міліцыі Беларусі (апошнія 6 гадоў служыў у крымінальным вышуку; званне - капітан). Ці рэальна ўладкавацца ў маім выпадку ў паліцыю РФ? Грамадзянства беларускае...».

З гэтым кандыдатам на высокае званне паліцэйскага ўдалося пагутарыць журналістам. Ураджэнец Полацка 31-гадовы Яўген паведаміў, што жаданне пакінуць службу ў беларускай міліцыі было выклікана выключна асабістымі матывамі. «Са становішчам у сістэме МУС РБ мой сыход не звязаны», - паведаміў ён.

Відавочна, служба ў беларускай міліцыі не прайшла бясследна для Яўгена. Малады чалавек асабліва падкрэсліў: «У любым выпадку я - беларус. Нават калі набуду іншае грамадзянства - ім застануся. Па гэтай прычыне што-небудзь адмоўнае пра Беларусь, у тым ліку пра міліцыю, я ніколі не скажу, нават калі маюць месца рэчы негатыўныя».

Праблема зусім не тым, што ў пытаннях журналіста былы беларускі следчы бачыў нейкі падвох, а таму ў адказах праявіў максімальную асцярожнасць. Яўген звольніўся з міліцыі па пагадненні бакоў, а гэта значыць, што за ім няма нічога заганнага. У адваротным выпадку ён бы не хадзіў у паліцэйскія кадравыя службы з жаданнем служыць Расеі. Яго шасцігадовы вопыт службы ў крымінальным вышуку з'яўляецца сведчаннем прафесіяналізму. Лічыцца, што менавіта пасля гэтай мяжы опер становіцца прафесіяналам сваёй справы.

Практычна адзінай перашкодай для Яўгена і яго беларускіх калег у ажыццяўленні жадання прымерыць форму паліцэйскага ў цяперашні час з'яўляецца адсутнасць расейскага грамадзянства.

Федэральны закон «Аб паліцыі» тут не схіліцца: «На службу ў паліцыю маюць права паступаць грамадзяне Расейскай Федэрацыі не маладзейшы за 18 гадоў і не старэйшыя за 35 гадоў».

У той жа час расейская дзяржава ўжо стварыла для грамадзян Беларусі цэлы шэраг прэферэнцый для паскоранага атрымання грамадзянства РФ. У ідэале гэтую працэдуру можна прайсці менш чым за паўгода. Пры гэтым зусім неабавязкова займаць чаргу да Уладзіміра Пуціна за пашпартам. Акрамя прэзідэнта правам вырашаць пытанне з грамадзянствам РФ надзеленыя, у тым ліку, і кіраўнікі тэрытарыяльных упраўленняў федэральнай міграцыйнай службы. Больш за тое, расейскія парламентарыі працягваюць працу па паскарэнні і спрашчэнні працэдуры атрымання грамадзянства РФ.

...Няма ніякіх сумневаў, што сітуацыя былога опера Яўгена з Полацка і некаторых яго беларускіх калег, якія маюць намер служыць Расеі, выпадак, як гаворыцца, адзінкавы. Але нельга выключаць і актывізацыю працэсу. У МУС Расеі сур'ёзны кадравы голад.

Толькі ў ГУ МУС па Маскве сотні вакансій: як радавых паліцэйскіх, так і супрацоўнікаў крымінальнага вышуку, следчых і экспертаў з прапановамі зарплаты ад 30 да 55 тысяч расейскіх рублёў.

Дадаткова вакансіі адкрываюцца амаль штодня за кошт чысткі шэрагаў ад «пярэваратняў» у пагонах. Што вышэйшае кіраўніцтва расейскай паліцыі не хавае. Так што пры вырашэнні праблемы атрымання грамадзянства РФ адзінкавы выпадак цалкам можа набыць рысы масавага характару. Абстаноўка выклікае прыхільнасць. У беларускіх сілавых структурах - скарачэнне.