Леанід Заіка: Наменклатурная прыватызацыя дала асечку

Лукашэнка нарэшце зразумеў, што стварэнне холдынгу МАЗ-КаМАЗ не прывядзе да станоўчых змен у эканоміцы.

Так кіраўнік аналітычнага цэнтра «Стратэгія» Леанід Заіка пракаментаваў charter97.org крытыку Лукашэнкі з нагоды продажу Мінскага аўтамабільнага завода і Мінскага завода колавых цягачоў.

«Размовы на тэму прыватызацыі буйных прадпрыемстваў вядуцца ўжо даўно. У Беларусі ўсе любяць казаць, і, як правіла, больш за ўсіх кажуць тыя, хто ў гэтым нічога не разумеюць. Міхаіл Мясніковіч абараніў дысертацыю на тэму фінансава-прамысловых груп. Гэта адбылося да таго, як ён стаў прэм'ер-міністрам. Пасля абароны малады доктар навук у галіне эканомікі вырашыў заняцца рэалізацыяй сваіх дысертацыйных тэзісаў, і ва ўрадзе з'явілася мадэль стварэння холдынгаў. Cтратэгія Мясніковіча зручная для таго, каб, стаўшы ў руля такой кампаніі, пасля забраць яе сабе. Хутка, прыгожа і па-нашаму», - адзначыў эксперт.

Ён падкрэсліў, што спачатку ва ўрадзе вялася прапрацоўка дадзеных пытанняў для рэалізацыі задум прэм'ера, але пазней у многіх медыйных выданнях з'явіліся ацэнкі гэтага працэсу з боку прафесійных эканамістаў.

«У гэтых ацэнках гаварылася пра тое, што такая прыватызацыя праз холдынгі з'яўляецца варыянтам наменклатурнай прыватызацыі. Лукашэнка ўспрыняў пункт гледжання незалежных эканамістаў і часткі апазіцыйных палітыкаў і стаў перашкаджаць распаўсюджванню тэзісаў аб прыватызацыі праз холдынгі. У публікацыях шэрагу спецыялістаў, у чым я асабіста прымаў удзел, было пазначана, што расейскі КаМАЗ у 2012 годзе не прадаў за мяжу ніводнага грузавіка, і ў міжнародным супастаўленні прадукцыя КаМАЗа неканкурэнтаздольная, а беларускі МАЗ здольны прадаваць на экспарт свае грузавікі.

Гэтая кропка гледжання знайшла сваё адлюстраванне ў пазіцыі кіраўніка дзяржавы. Таму Лукашэнка ўлічыў існуючыя меркаванні і стаў выказвацца адмоўна да такой прыватызацыі, якая, вядома ж, не прывядзе да станоўчых змен у эканоміцы. Сёння на парадку дня стаяць не дробныя холдынгі ўнутры краіны, а МАЗ, нафтаперапрацоўчыя заводы і калійны камбінат. Але па іх ўрад нічога добрага пакуль што не прапанаваў», - сказаў на заканчэнне Леанід Заіка.

Нагадаем, выступаючы ў пятніцу з пасланнем да народа і «парламента», беларускі кіраўнік рэзка раскрытыкаваў спробы расейскага бізнесу атрымаць кантроль над МАЗам і МЗКЦ.