КДБ затрымаў намесніка міністра спорту і турызму
67- 26.04.2013, 18:47
(абноўлена - 18.55) Супрацоўнікі КДБ затрымалі намесніка міністра спорту і турызму Беларусі Сяргея Нерада.
«У рамках рэалізацыі мерапрыемстваў супрацьдзеяння карупцыі і абароны эканамічных інтарэсаў дзяржавы Камітэтам дзяржаўнай бяспекі затрыманы намеснік міністра спорту і турызму Беларусі Сяргей Нерад», - паведамілі ў КДБ.
У дачыненні да яго распачатая крымінальная справа паводле ч.3 арт.430 КК (атрыманне хабару службовай асобай, якая займае адказную пасаду), праводзяцца следчыя дзеянні.
Сяргей Нерад нарадзіўся 16 чэрвеня 1968 года ў Калодзішчах Менскага раёна Менскай вобласці. У 1991 годзе скончыў Беларускі дзяржаўны інстытут фізічнай культуры на спецыяльнасці «фізічная культура і спорт».
Працаваў старшым інструктарам-метадыстам Менскага вучылішча алімпійскага рэзэрву №2, намеснікам дырэктара, дырэктарам Менскага абласнога вучылішча алімпійскага рэзэрву.
З 2003 да 2010 года - намеснік, першы намеснік, начальнік управы фізічнай культуры, спорту і турызму Менскага аблвыканкама.
На пасаду намесніка міністра спорту і турызму Сяргей Нерад прызначаны ў 2010 годзе.