Лукашэнка: Нас сёння плюшчаць

Беларускі кіраўнік успомніў «ліхія 90-я».

Сёння Лукашэнка сустрэўся са студэнтамі і выкладчыкамі Беларускага дзяржаўнага аграрнага тэхнічнага ўніверсітэта.

«Сельская гаспадарка - гэта і харчаванне, якое ўсім трэба кожны дзень, і сыравіна для перапрацоўчай прамысловасці, і сфера дзейнасці значнай часткі насельніцтва. Ад стану спраў у гэтым сектары эканомікі залежыць дабрабыт народа і стабільнасць дзяржавы», - адзначыў Лукашэнка.

Ён падкрэсліў, што з усіх відаў бяспекі краіны харчовая мае асаблівае значэнне, а галодныя бунты - гэта вялікая небяспека для любой дзяржавы і трагедыя для грамадства.

У сувязі з гэтым ён нагадаў пра 90-я гады, калі часам нават у Менску запасаў мукі для выпечкі хлеба заставалася ўсяго на 2-3 дня, а харчовыя тавары ў крамах размяркоўваліся па талонах.

«Таму перад аграрыямі была пастаўленая задача - адрадзіць сельскагаспадарчую вытворчасць, значна перасягнуць аб'ёмы і тэмпы часоў СССР і тым самым забяспечыць харчовую бяспеку нашай краіны. Запатрабаваліся вялізныя намаганні і мабілізацыя ўсіх унутраных рэсурсаў, каб пераадолець гэтыя цяжкасці», - сказаў беларускі кіраўнік.

«Менавіта тады мы пераканаліся ў абсурднасці рэкамендацый тых замежных і мясцовых экспертаў, якія сцвярджалі, што не трэба развіваць сваю сельскую гаспадарку, маўляў, «закапаем зямлі ў зямлю», а лепш закупляць замежную прадукцыю. Але харчовая залежнасць - гэта кабала і беспрасветны тупік. Таму мы зрабілі стаўку на развіццё і падтрымку айчыннага аграрнага сектара», - адзначыў Лукашэнка.

Аб'яднанне «Гомсельмаша» і «Растсельмаша» пад пытаннем

Лукашэнка заявіў, што расейскі бок не спяшаецца выказаць сваё меркаванне з нагоды прапановы Беларусі аб аб'яднанні ВА «Гомсельмаш» і ААТ «Растсельмаш».

«Думаюць. Мне здаецца, гэтыя думы скончацца нічым. Мне здаецца, яны (у Расеі) не вельмі да гэтага спяшаюцца», - заявіў Лукашэнка.

Як адзначыў беларускі кіраўнік, «для нас было б выгадным, калі б яны пагадзіліся на нашыя ўмовы, таму што «Растсельмаш» сёння вельмі слаба працуе».

«Калі б мы ўзялі пад кантроль наша прадпрыемства, мы ўзялі б пад кантроль увесь расейскі рынак», - сказаў Лукашэнка.

«Адкуль нарадзілася гэтая ідэя? Вы чуеце, як нас сёння прэсуюць: аддай тое прадпрыемства, прадай гэта. Я, як толькі магу, супраціўляюся. А дзе мы маглі б аб'яднаецца, там нам не хочуць плаціць нармальныя грошы», - заявіў ён.

«Але я кажу: у нас ёсць прапанова - давайце возьмем ваш «Растсельмаш», давядзем яго да ўзроўню хоць бы «Гомсельмаша», аб'яднаем рынкі і г.д.», - сказаў беларускі кіраўнік.

«Песня Ланской адна з лепшых на «Еўрабачанні»

Беларускі кіраўнік лічыць песенны конкурс «Еўрабачанне» абсалютна не аб'ектыўным.

«Я, можа быць, больш, чым вы, перажываю за гэты конкурс, хоць выдатна разумею і ўсведамляю ўсё, што там адбываецца, для многіх з вас гэта ўтоена. Я ведаю, што гэта абсалютна не аб'ектыўны конкурс, - заявіў ён. - Любая дзяржава, калі трэба, можа табе даць любы бал, і ўсё, што вы бачыце з экрана, гэтыя балы і гэтак далей - усё гэта фікцыя, шоў».

Паводле слоў Лукашэнкі, улічваючы, што краіны на «Еўрабачанні» галасуюць у асноўным за сваіх суседзяў, каб перамагчы, трэба паказаць што-то вельмі асаблівае. «Гэты конкурс не зусім аб'ектыўны, і для нас, беларусаў, перамагчы - гэта вяршыня ўсяго. Не ведаю, што павінна адбыцца», - лічыць ён.

Што тычыцца магчымасці ўдалага выступлення на маючым адбыцца конкурсе прадстаўніцы Беларусі Алены Ланской, Аляксандр Лукашэнка перакананы, што ў яе ёсць усё, каб добра выступіць, і песня ў яе адна з лепшых.

«Хацеў бы пабудаваць другую АЭС, але няма грошай»

Лукашэнка заявіў, што пры наяўнасці фінансавых магчымасцяў у краіне неабходна было б пабудаваць другую атамную электрастанцыю.

«Калі б была магчымасць другую атамную станцыю пачаць будаваць, то я б абавязкова пачаў яе будаваць. Але пакуль у мяне няма ні генпадрадчыка, ні грошай, ні краіны, якая б выдзеліла крэдыт для будаўніцтва», - адзначыў ён.

Каментуючы крытыку, якая гучыць з нагоды будаўніцтва беларускай АЭС, кіраўнік заявіў, што «гэта ўсё праплачана».

«Наша станцыя і расейская станцыя ў Калінінградзе - гэта костка ў горле Еўразвязу і прыбалтыйскім дзяржавам», - сказаў Лукашэнка. «Яны спазніліся, у іх ужо не атрымаецца пабудаваць сваю станцыю, яны ўжо нам не канкурэнты і ім прыйдзецца купляць нашу электраэнергію і расейскую», - дадаў ён.

Таксама, працягнуў ён, «Еўразвяз, хоць і мае лішкі электраэнергіі, але яна даражэй». «Тым жа немцам няма куды будзе прадаваць гэтую электраэнергію», - адзначыў кіраўнік.

У сувязі з гэтым, паводле яго слоў, «ідзе канкурэнтная барацьба, і яны нашу пятую калону настройваюць на тое, каб змагацца супраць будаўніцтва нашай АЭС».

Акрамя таго, Лукашэнка канстатаваў, што «мы акружаныя ланцугом атамных станцый, мы ўжо жывем у гэтай зоне небяспечнай». «Так што будзе лепш: мы будзем глядзець на чужыя ці сваю пабудуем атамную электрастанцыю?» - рытарычна заўважыў Лукашэнка.