КНДР рыхтуе новае ядзернае выпрабаванне

Улады Паўднёвай Карэі папярэдзілі пра тое, што КНДР, магчыма, вядзе падрыхтоўку да чацвёртага ядзернага выпрабавання.

Паўднёвакарэйскі міністр па справах аб'яднання Рэ Кіль Чжэ заявіў на парламенцкіх слуханнях у панядзелак, што на галоўным паўночнакарэйскім ядзерным палігоне назіраецца павышаная актыўнасць. Па словах міністра, сітуацыя нагадвае тую, што папярэднічала трэцяму ядзернаму выпрабаванню, якое адбылося 12 лютага гэтага года.

У панядзелак паўднёвакарэйская газета «Чунан Ільбо» паведаміла са спасылкай на неназванага прадстаўніка ўрада ў Сеуле, што выведка Паўднёвай Карэі заўважыла больш актыўны рух людзей і машын на ядзерным палігоне на паўночна-ўсходзе КНДР, перадае ВВС.

Па словах крыніцы газеты, Паўднёвая Карэя старанна сочыць за сітуацыяй і спрабуе зразумець, ці сапраўды мы назіраем падрыхтоўку да ядзернага выпрабавання або проста маем справу са спробай узмацніць ціск на нас і ЗША.

Пасля лютаўскага ядзернага выпрабавання ААН наклала новыя жорсткія санкцыі на Паўночную Карэю. У адказ Пхеньян выступіў з шэрагам агрэсіўных заяў, у тым ліку з пагрозамі ўжыць ядзерную зброю і аднавіць працу ядзернага рэактара.

У канцы мінулага тыдня Паўночная Карэя папярэдзіла, што не гарантуе бяспеку дыпламатычных місій на сваёй тэрыторыі ў выпадку пачатку ваенных дзеянняў.

Раней Пхеньян адключыў гарачую тэлефонную лінію паміж ваеннымі камандаваннямі дзвюх Карэй.