«Белнафтахім» спадзяецца на 23 мільёны тон расейскай нафты

Нягледзячы на адсутнасць падпісанага нафтавага балансу на 2013 год, «Белнафтахім» лічыць, што пастаўкі расейскай нафты складуць запытаныя 23 млн тон.

У канцэрне «Белнафтахім» лічаць, што пастаўкі расейскай нафты ў Беларусь у 2013 годзе складуць запытаныя 23 млн тон, паведамляе «Інтэрфакс».

«У нас графік першага і другога кварталаў сфарміраваны зыходзячы з дадзеных лічбаў. Таму, гадавыя пастаўкі ў запланаваным аб'ёме будуць», - заявіў намеснік старшыні канцэрна «Белнафтахім» Уладзімір Волкаў у панядзелак у Менску ў кулуарах міжнароднай канферэнцыі «Беларуская нафтаперапрацоўка і экспарт нафтапрадуктаў».

Пры гэтым ён лічыць, што «перспектывы падпісання гадавога балансу добрыя».

Намеснік старшыні канцэрна таксама адзначыў, што беларускі бок разлічвае на імпарт у трэцім квартале гэтага года 5,75 млн тон нафты з Расеі, што адпавядае ўзгодненаму аб'ёму паставак у першым і другім кварталах і ў гадавым вымярэнні адпавядае запытанаму аб'ёму імпарту нафты на ўзроўні 23 млн тон.

«Беларускі бок зыходзіць з імпарту ў трэцім квартале 5,75 млн тон нафты і першыя два квартала гэта пацвярджаюць», - сказаў намеснік кіраўніка «Белнафтахіма».

Уладзімір Волкаў таксама падкрэсліў, што «беларускі бок цалкам выконвае свае абавязацельствы па пастаўцы нафтапрадуктаў на расейскі рынак». «Мы раз у месяц сустракаемся з Мінэнерга Расіі і «звяраем гадзіннікі» з улікам абумоўленых прынцыпаў коштаўтварэння. Апошні раз гэтыя кантакты былі на мінулым тыдні. Мы выконваем свае абавязацельствы і маем намер іх выконваць і далей», - сказаў ён.

Намеснік кіраўніка канцэрна не стаў каментаваць бягучы ўзровень рэнтабельнасці нафтаперапрацоўкі ў Беларусі, але падкрэсліў, што «яна, безумоўна, станоўчая». Паводле яго слоў, станоўчы ўзровень рэнтабельнасці нафтаперапрацоўкі забяспечваецца, у тым ліку, і пры пастаўках нафты ў Беларусь чыгуначным транспартам, якія ў мінулым годзе адсутнічалі. «Усе віды транспарту добрыя. Так, выдаткі пры пастаўках чыгуначным транспартам вышэй, але пры гэтым магчымая пастаўка нафты з меншым утрыманнем серы ў параўнанні з тым, што пастаўляецца па трубе. І гэта дазваляе павялічыць выхад светлых нафтапрадуктаў».

Нагадаем, беларускія ўлады пакуль і не змаглі дасягнуць дамоўленасці аб аб'ёме імпарту нафты з Расеі ў 2013 годзе. Аб'ём паставак узгоднены толькі на тры квартала. Беларускі бок запытвае на 2013 год 23 млн тон нафты, расейскі бок заяўляў пра гатоўнасць паставіць толькі 18,5 млн тон з улікам неабходнасці загрузкі нафтаправода БТС-2.