Пад Гродна ў возеры «вылавілі» аўтамабіль

Кіроўца забыўся паставіць машыну на ручны тормаз, і яна пакацілася ў вадаём.

23 траўня ў 13-39 на цэнтр аператыўнага ўпраўлення гродзенскім выратавальнікам паступіла паведамленне з ДАІ аб тым, што каля вёскі Новікі патрабуецца дапамога ў выманні аўтамабіля з возера, паведамляе прэс-служба МНС.

У вадаёме памерамі 100х100 метраў, у 4 метрах ад берага практычна цалкам пад вадой знаходзіўся аўтамабіль Daewoo 1996 выпуску. Са слоў уладальніка транспартнага сродку, які ехаў на дачу, ён выйшаў з машыны каля ляснога масіва каля возера на некалькі хвілін, але не паставіў аўто на ручны тормаз. Паколькі да вадаёма ішоў невялікі ўхіл, аўтамабіль пакаціўся да вады. У машыне ў той момант нікога не было. Легкавік сышоў у ваду па дах.

Аддзяленнем вадалазнай службы Daewoo зафіксаваны рамянямі, а затым выняты з вадаёма пры дапамозе МАЗа.