NASA апублікавала гігапіксельную панараму Марса

Амерыканскае касмічнае агенцтва NASA апублікавала сабраную з амаль 900 здымкаў унікальную панараму «чырвонай планеты».

Яна была зробленая марсаходам Curiosity. Арыгінал панарамы даступны на сайце NASA. Сціснутую да 159 мегабайт версію можна спампаваць на сайце лабараторыі JPL.

Усе здымкі былі зробленыя ў перыяд з 5 кастрычніка да 16 лістапада 2012 года на пясчанай дзялянцы, якая атрымала назву Рокнэст, дзе Curiosity раней адбіраў пробы грунту. На панараме можна разгледзець блізкія дзялянкі паверхні Марса, якія выглядаюць па-рознаму праз адрозненні ў асвятленні і розную колькасць пылу ў атмасферы планеты.

Curiosity апусціўся на паверхню Марса 6 жніўня 2012 года. За час знаходжання ён выявіў сведчанні таго, што раней на планеце была вада і кісларод. Таксама былі знойдзеныя прыкметы вугляроду, што можа сведчыць пра існаванне ў мінулым некаторых формаў жыцця на «чырвонай планеце».