Пустыя абяцанні і пустыя аэрапорты

Вар'яцка дарагія аэрапорты, пабудаваныя ва Украіне да Еўра-2012 і раскрытыкаваныя за велізарныя памеры, выкарыстоўваюцца не на поўную магутнасць.

Перад Еўра-2012 украінскі ўрад неаднаразова заяўляў пра тое, што чэмпіянат Еўропы па футболе прынясе інвестыцыі ва ўкраінскую інфраструктуру і зблізіць краіну з Еўропай. Усё гэта, піша журналіст Юрый Дуркот на старонках нямецкага выдання Tageszeitung, апынулася пустымі абяцаннямі.

Як і раней, на мяжы з ЕЗ з-за павольнай працы мытных органаў утвараюцца шматкіламетровыя заторы з аўтамашын, перасекчы мяжу з Еўразвязам на цягніку таксама праблематычна. Самы хуткі спосаб дабрацца да Польшчы - чыгункай - усё роўна займае сем з паловай гадзін, гаворыцца ў артыкуле. Не лепшая сітуацыя і з паветраным транспартам. Польская авіякампанія EuroLOT і чэшская CSA адмянілі вялікую частку сваіх рэйсаў ва ўкраінскі Львоў і па меркаваннях рэнтабельнасці цалкам перасталі лятаць у Данецк. «Сучасныя і вар'яцка дарагія аэрапорты, якія былі раскрытыкаваныя за велізарныя памеры яшчэ падчас будаўніцтва, выкарыстоўваюцца не на поўную магутнасць», - падкрэслівае Дуркот. Так, украінскае выданне «Зеркало недели» ацэньвае загрузку львоўскага і данецкага аэрапортаў міжнароднага класа на 8-10%.

Між тым, падкрэслівае аўтар, іх пабудова абышлася ўкраінскім падаткаплатнікам прыкладна ў 1,5 млрд даляраў. Таксама не апраўдалі чаканняў закупка да ЧЕ хуткасных цягнікоў Hyundai і будаўніцтва вялікай колькасці сучасных футурыстычных футбольных стадыёнаў. Львоўскі і кіеўскі стадыёны, будаўніцтва якіх было цалкам аплачана з казны, пустуюць. Ходзяць чуткі, што львоўскі нават збіраюцца зносіць з-за таго, што мясцоваму футбольнаму клубу не пацягнуць выдаткі на яго ўтрыманне.

Усяго на падрыхтоўку да чэмпіянату было выдаткавана ад 5 да 15 млрд даляраў, дадае аўтар.

Пераклад: Inopressa.ru