Пагоня са стральбой у цэнтры Менска

Пяць машын Менскай ДАІ пераследвалі таксіста - былі чутныя стрэлы.

Ізноў на вуліцах сталіцы вёўся пераслед аўтамабіля. На гэты раз супрацоўнікі ДАІ спрабавалі спыніць аўтамабіль з налепкамі таксі. Па словах чытача onliner.by было зроблена некалькі стрэлаў, таксіста ўдалося затрымаць у адным з двароў на пр. Пушкіна.

«Машыны рухаліся па пр. Пушкіна з боку пр. Жукава, - апісаў убачанае Аляксандр. - На гадзінніку было каля 4 раніцы. Наперадзе рухалася, як мяркуецца, Audi 100. За ёй - з уключанымі пробліскавымі маячкамі і гукавой сігналізацыяй прыкладна пяць машын ДАІ. На скрыжаванні праспекта Пушкіна і вул. Прытыцкага кіроўца таксі паехаў прама, у бок вуліцы Матусевіча. Падчас руху па кольцы было прыкметна, што пярэдняе правае кола ў яго прабіта. Быў чутны рып вобада аб асфальт».

«У наступную секунду пачулася 3-4 воплескі, - дапоўніў малады чалавек. - Мяркую, што гэта былі стрэлы. Пасля гэтага праследуемы кіроўца Audi павярнуў у двары. Інспектары - за ім. Праз некалькі хвілін машыны ДАІ вярталіся назад. Мяркуючы па ўсім, затрымалі парушальніка».

У ДАІ паведамілі некаторую інфармацыю аб пагоні:

«Паступіла паведамленне ад кіроўцаў. Той, хто тэлефанаваў, сцвярджаў, што кіроўца таксі Audi 100 можа быць п'яны - пра гэта казала яго манера язды. Машыны ДАІ выехалі, але мужчына, які знаходзіўся за рулём, не падпарадкаваўся патрабаванням аб спыненні. Пачаўся пераслед на тэрыторыі Цэнтральнага раёна, скончыўся ў Фрунзенскім. Падчас пагоні кіроўца Audi два разы здзейсніў ДТЗ і схаваўся з месца аварыі, праігнараваў сігнал святлафора, разметку, выязджаў на сустрэчную паласу, ствараў аварыйныя сітуацыі. Акрамя таго, як атрымалася ўстанавіць пазней, ён быў п'яны. У выніку на мужчыну 1955 г. н. склалі 9 пратаколаў».

«У раёне скрыжавання вуліц Адаеўскага і Еўфрасінні Полацкай быў зроблены першы стрэл - папераджальны ў паветра, - дапоўнілі інспектары. - Аднак парушальнік не знізіў хуткасць. На пр. Пушкіна быў адкрыты агонь з табельнай зброі па колах (3 стрэлы). Такім чынам атрымалася спыніць машыну, якая пераследвалася. Пасля таго як аўтамабіль быў спынены, кіроўца выйшаў з машыны і паспрабаваў схавацца. Супрацоўнікі былі вымушаныя ўжыць спецсродкі - кайданкі».

Старэшы інспектар па агітацыі і прапагандзе ДАІ Цэнтральнага раёна Анастасія Цыбіна паведаміла падрабязнасці: «Рана ранкам (прыкладна ў 3:00) 25 чэрвеня кіроўца аўтамашыны Hyundai паведаміў на лінію 102 аб тым, што наперадзе па вул. Шчорса рухаецца аўтамабіль таксі і кіроўца, падобна, знаходзіцца ў стане алкагольнага ап'янення. Паведаміў дзяржнумар, рухаўся за ім і распавядаў пра напрамак руху аўтамабіля. Кіроўца (1955 года нараджэння) таксі Audi, заўважыўшы, што за ім рухаецца Hyundai, зразумеў, што той яго пераследуе, прытармазіў і пачаў рух заднім ходам, у выніку здзейсніў ДТЗ, пасля чаго схаваўся. Інфармацыя была перададзеная ўсім экіпажам ДАІ. Каля 3:30 на скрыжаванні праспекта Незалежнасці і Гарадскога Вала аўтамабіль таксі ўбачылі супрацоўнікі ДАІ Цэнтральнага раёна, на неаднаразовыя патрабаванні аб спыненні кіроўца таксі не рэагаваў, а толькі павялічваў хуткасць, пачаўся пераслед, падчас якога ён неаднаразова парушаў ПДР».

«На тэрыторыі Фрунзенскага раёна кіроўца таксі здзейсніў сутыкненне са службовым аўтамабілем супрацоўнікаў аддзела пазаведамаснай аховы, які спыніўся на светлафоры, пасля чаго пакінуў месца здарэння, - дапоўніла Анастасія Цыбіна. - Супрацоўнікамі аддзела ДАІ Цэнтральнага РУУС было прынятае рашэнне аб спыненні кіроўцы з ужываннем табельнай зброі, быў зроблены стрэл, але з-за вялікай хуткасці куля толькі зачапіла аўтамабіль. Затрыманы таксіст быў толькі на дваровай тэрыторыі пр. Пушкіна. У дачыненні да кіроўцы складзена дзевяць адміністрацыйных пратаколаў за парушэнне ПДР, у тым ліку і за два ДТЗ. У крыві кіроўцы выяўлена каля 1 праміле алкаголю».

Нагадаем, у мінулым годзе ў цэнтры Менска супрацоўнікі ДАІ таксама вялі пераслед Mercedes чорнага колеру са стральбой. Тады затрымаць п'янага кіроўцу ўдалося толькі праз некалькі месяцаў.