Валютныя крэдыты на жыллё вернуць?

Саўмін зноў заявіў пра неабходнасць аднаўлення крэдытавання фізічных асоб у валюце на будаўніцтва жылля.

«Неабходна працягнуць зніжэнне адсоткавых ставак па крэдытах на будаўніцтва жылля, а таксама вярнуцца да выдачы крэдытаў грамадзянам на жыллёвае будаўніцтва ў замежнай валюце», - заявіў віцэ-прэм'ер Анатоль Калінін ў аўторак на нарадзе ў кіраўніка па пытаннях жыллёвага будаўніцтва.

«Пакуль Нацыянальны банк гэтую прапанову аб выдачы крэдытаў у замежнай валюце не падтрымлівае», - цытуе віцэ-прэм'ера прэс-служба Лукашэнкі.

Як паведамлялася, з ініцыятывай аб аднаўленні крэдытавання фізічных асоб у замежнай валюце на будаўніцтва жылля ў пачатку года публічна выступіў прэм'ер-міністр Беларусі Міхаіл Мясніковіч. «Для будаўніцтва жылля мяркую мэтазгодным дазволіць крэдытаванне фізічных асоб у валюце. Прашу Нацыянальны банк і камерцыйныя банкі падтрымаць», - заявіў ён у лютым на пасяджэнні Савета міністраў.

Прэм'ер адзначыў, што ў 2013 годзе аб'ём сродкаў насельніцтва, якія накіроўваюцца на будаўніцтва жылля, павінен вырасці больш чым на Br15 трлн. «І без належнай крэдытнай падтрымкі па даступных адсоткавых стаўках рэалізаваць гэта будзе проста немагчыма», - падкрэсліў Мясніковіч.

Між тым, кіраўнік Нацбанка Беларусі Надзея Ермакова, пасля разгляду гэтага пытання праўленнем НББ, заявіла, што не падтрымлівае ініцыятыву прэм'ер-міністра. «Мы не падтрымалі гэтую ініцыятыву прэм'ера, дадзенае рашэнне з ім узгоднена - валютныя крэдыты для насельніцтва не будуць вернутыя», - сказала Ермакова, адзначыўшы тэарэтычную магчымасць вяртання да абмеркавання гэтага пытання праз 1-2 гады. «У нас няма неабходнасці адмяняць гэтую забарону, шмат праблем было ў сувязі з дэвальвацыяй», - заявіла кіраўнік Нацбанка. «Нам валюта патрэбная для іншых мэтаў», - дадала яна.

Нагадаем, Нацыянальны банк Беларусі ў сярэдзіне 2009 года забараніў выдачу беларускімі банкамі валютных крэдытаў фізічным асобам, а ў канцы 2010 года канчаткова забараніў валютнае крэдытаванне фізічных асоб. Рашэнне было абгрунтавана высокім узроўнем рызыкі па валютных крэдытах, які востра праявіўся ў перыяд валютна-фінансавага крызісу ў 2011 годзе, калі дэвальвацыя беларускага рубля склала амаль 200%.