Афрыканская чума муціруе і небяспечная для людзей
25- 10.07.2013, 12:01
- 43,600
Галоўны санітарны ўрач Расеі заявіў, што з-за мутацыі віруса АЧС можа прадстаўляць вялікую небяспеку для людзей.
Генадзь Анішчанка не выключае, што вірус афрыканскай чумы свіней (АЧС) у будучыні можа пагражаць чалавеку.
«Калі ўзгадаць, што свіння па сваёй фізіялогіі вельмі блізкая да чалавека, і яны хварэюць гэтак жа, як і мы, то ёсць падставы думаць, што ў чарговым туры мутацыі гэтага віруса ён можа стаць небяспечным для чалавека», - паведаміў Анішчанка журналістам у сераду у Пецярбургу, піша «Інтэрфакс».
Ён падкрэсліў, што ў цяперашні час захворванне не небяспечнае для людзей - яно нясе для чалавека толькі негатыўныя эканамічныя наступствы.
Ён таксама лічыць бескарыснай мерай ініцыятыву Літвы па ўзвядзенні на мяжы бар'ера для барацьбы з АЧС, якая распаўсюджваецца ў Беларусі.
«Калі ў іх ёсць сродкі - хай ставяць плот, але мера бескарысная. Захворванне можа распаўсюдзіцца ў выпадку несанкцыянаванага завозу на тэрыторыю краіны нелегальнага мяса. Таксама існуе небяспека перадачы віруса праз збожжа», - сказаў Анішчанка.
«Вірус устойлівы. Тут павінны быць самыя жорсткія каранцінныя меры. Так што Літва хай выдаткуе грошы больш рацыянальна. Не займаецца будаўніцтвам плота, а выконвае міжнародныя меры», - заявіў галоўны санітарны ўрач Расеі.
Нагадаем, у Беларусі афіцыйна зафіксаваныя два ачага афрыканскай чумы свіней - у Гродзенскай і Віцебскай абласцях. Аднак пра выпадкі заражэння афрыканскай чумой свіней паведамляецца з розных рэгіёнаў краіны.
Кіраўнік ветэрынарна-харчовай службы Літвы Ёнас Мілюс назваў сітуацыю ў Беларусі ў сувязі з успышкай афрыканскай чумы свіней некіравальнай.
У выніку быў забаронены ўвоз мясной прадукцыі з Беларусі ў Літву, Латвію, Польшчу, Расею і Украіну.