Расейскія памежнікі пратаранілі лодку з украінскімі рыбакамі

Двое грамадзян Украіны загінулі ў Азоўскім моры. Яшчэ двое прапалі без вестак.

Інцыдэнт адбыўся ўвечары 17 ліпеня. Лодка пацярпела крушэнне з-за таго, што яе пераследвалі расейскія памежнікі на катэры «Мустанг». Паводле інфармацыі крыніцы, памежнікі ўрэзаліся ў лодку, у выніку чаго яна перакулілася, піша сайт 0629.com.ua. Сутыкненне адбылося ва ўсходняй частцы Азоўскага мора, каля пасёлка Варанцоўка.

У Дзяржаўнай памежнай службе Украіны пацвердзілі гібель дваіх украінцаў, яшчэ двое абвешчаныя прапаўшымі без вестак. Вядуцца іх пошукі.

У сувязі з інцыдэнтам у Азоўскім моры ў МЗС выкліканы часовы павераны Расеі ва Украіне Андрэй Вараб'ёў, піша «Корреспондент».

Украінскі бок на сустрэчы прадстаўляў в.а. міністра замежных спраў Руслан Дземчанка, які выказаў занепакоенасць у сувязі з дзеяннямі расейскіх памежнікаў, якія, на думку ўкраінскага боку, былі празмернымі і не адпавядалі сітуацыі.

Акрамя таго, часовы кіраўнік украінскага МЗС уручыў расейскаму дыпламату ноту з патрабаваннем правядзення аб'ектыўнага расследавання інцыдэнту.

Таксама ў дакуменце адзначаецца, што Расея абавязаная прыняць меры для прадухілення падобных сітуацый у будучыні.

У сваю чаргу Вараб'ёў запэўніў, што расейскі бок забяспечыць пошук зніклых без вестак і рэпатрыяцыю целаў загінулых украінскіх грамадзян.

У МЗС таксама паведамілі, што на месца здарэння прыбыў Генконсул Украіны ў Растове-на-Доне.