Касмадром Байканур эвакуяваны з-за выбуху расейскай ракеты

Ракеты-носьбіт «Пратон-М» з трыма навігацыйнымі спадарожнікамі ўпала з-за адмовы рухавіка.

Пра гэта заявіла МНС Казахстана.

Раней крыніца ў ракетна-касмічнай галіне паведаміла, што прычынай маглі стаць праблемы альбо з рухавіком, альбо з сістэмай кіравання. Калі аварыя адбылася на 10-20-х секундах, то рухавік, хутчэй за ўсё, з'яўляецца прычынай, сказаў ён.

Іншая крыніца выказала здагадку, што адмовіў адзін з рулявых рухавікоў, піша NEWSru.com.

Па дадзеных тэлеметрыі, на чацвёртай секундзе палёту ракеты пачаліся адхіленні па тангажу. На 12-й секундзе яны ўзмацніліся. На 17-й секундзе прайшло аварыйнае выключэнне рухавікоў. Пасля гэтага ракета пачала развальвацца ў паветры, на 32-й секундзе яна ўпала і выбухнула.

«Маршавыя рухавікі першай ступені ракеты працягвалі працаваць аж да яе падзення. Мяркуючы па ўсім, аўтаматыка зафіксавала адмову, але не выключыла маршавыя рухавікі, каб адвесці ракеты далей ад месца старту», - паведаміў суразмоўца агенцтва «Інтэрфакс».

Яшчэ адна крыніца агенцтва на касмадроме заявіла, што ракета была некіравальная з моманту старту: «Яе разгойдвала адразу пасля адрыву ад стартавага стала. У адпаведнасці з праграмай, рухавікі ўключыліся на фарсаж і выконвалі звод ад стартавага комплексу. Ракета ўпала прыкладна ў 1 кіламетры ад старту», - сказаў ён.

Ракета-носьбіт павалілася недалёка ад 200-й стартавай пляцоўкі касмадрома. Спецыялісты, якія знаходзіліся ў бункеры стартавага комплексу, жывыя. Камісіі Раскосмаса трэба будзе ацаніць нанесеную тэрыторыі шкоду. Усяго на Байкануры маецца чатыры стартавыя пазіцыі пад ракету «Пратон», але дзве з іх не выкарыстоўваюцца - адну планавалася мадэрнізаваць пад запускі ракет «Ангара». Такім чынам, пакуль не будзе ацэненая шкода для 81-й пляцоўкі, з якой рабіўся старт, адзінай дзеючай пляцоўкай для запуску «Пратонаў» застаецца толькі 200-я.

Спецыялістаў, якія працавалі на 254-й і 2-й пляцоўках Байканура, тэрмінова эвакуявалі з-за таго, што над месцам падзення ракеты ўтварылася воблака з пароў атрутных кампанентаў ракетнага паліва. Яно ссоўваецца ў напрамку гэтых пляцовак. Не выключана, што яно выйдзе за межы касмадрома.

Кіраўнік Казкосмаса Талгат Мусабаеў удакладніў, што на борце «Пратона» знаходзілася 600 тон гептыла і аміла. Паводле яго слоў, пры выбуху ракеты адбылося амаль поўнае згаранне атрутнага гептыла, дождж, які пачаўся, згладзіў экалагічныя наступствы аварыі.