Расеец адкупіўся ад беларускага КДК 300 мільёнамі рублёў

Камітэт дзяржкантролю спыніў крымінальную справу супраць грамадзяніна Расеі пасля выплаты ім у бюджэт 278 мільёнаў рублёў.

Справа па ч. 2 артыкула 233 КК («Незаконная прадпрымальніцкая дзейнасць») была ўзбуджаная некалькі месяцаў таму. У якасці падазраванага выступаў расеец, піша сайт КДК.

На працягу 2012 года ўраджэнец Смаленска вёў на тэрыторыі Беларусі прадпрымальніцкую дзейнасць без дзяржрэгістрацыі. Ён купляў б/у імпартныя аўтамабілі без афіцыйнага афармлення здзелак куплі-продажу і рэгістрацыі транспартных сродкаў у органах ДАІ, а пасля прадаваў машыны грамадзянам Беларусі, Расеі і Казахстана».

«Усяго за год ім было рэалізавана 15 дарагіх аўтамабіляў. У выніку незаконнай прадпрымальніцкай дзейнасці расеец атрымаў прыбытак у памеры 278 мільёнаў рублёў.

У ходзе расследавання крымінальнай справы яе фігурант унёс у бюджэт ўсю суму незаконна атрыманага даходу. Улічваючы гэтую акалічнасць, а таксама актыўнае раскаянне і садзейнічанне расследаванню, у цяперашні час крымінальны пераслед у дачыненні да правапарушальніка спынены», - гаворыцца ў паведамленні Камітэта дзяржкантролю.

Адзначым, што згодна з заканадаўствам, правапарушэнне, здзейсненае грамадзянінам Расеі, прадугледжвае накладанне штрафу.