Аблавы на мігрантаў ад Камчаткі да Пермі (Відэа)

Геаграфія палявання на нелегальных працоўных мігрантаў у Расеі пашыраецца.

Услед за Масквой і Санкт-Пецярбургам «зачысткі» на мясцовых рынках прайшлі ў мінулыя выходныя на Камчатцы, у Цюмені, Пермі і пад Валгаградам. У выніку былі затрыманыя больш за 1,3 тысячы замежнікаў.

У Пермі паліцэйскія пры падтрымцы супрацоўнікаў Федэральнай міграцыйнай службы затрымалі 413 працоўных мігрантаў у ходзе рэйду на тэрыторыі аптовага рынку «Заастроўка» 11 жніўня. У дачыненні да парушальнікаў правілаў уезду альбо рэжыму знаходжання ў РФ складзена 11 адміністрацыйных пратаколаў, адчыталася рэгіянальнае ГУ МУС.

Пры гэтым высветлілася, што некаторыя з затрыманых займаюцца прадпрымальніцкай дзейнасцю незаконна, без афармлення статусу індывідуальнага прадпрымальніка, адзначаецца ў прэс-рэлізе, піша NEWSru.com.

Мясцовыя жыхары і блогеры неаднаразова выказвалі незадаволенасць у сувязі з гэтым рынкам: яны наракалі на празмерную колькасць выхадцаў з краін блізкага замежжа і заяўлялі, што прыезджыя гандляры ўчыняюць канфлікты з мясцовым насельніцтвам, адзначае «Інтэрфакс» у гэтай сувязі.

У Цюмені больш за 800 нелегальных мігрантаў затрыманыя падчас рэйдаў на дзве будоўлі і два буйных рынкі, паведамляе абласное УМВД. Складзена больш за 60 пратаколаў па арт. 18.8 КаАП РФ («Парушэнне замежным грамадзянінам або асобай без грамадзянства правілаў уезду ў РФ альбо рэжыму знаходжання ў РФ»), гаворыцца ў прэс-рэлізе.

У Гарадзішчанскім раёне Валгаградскай вобласці паліцыянты выявілі цэлую нелегальную цяплічную гаспадарку, у якой працавалі больш за 100 грамадзян Кітая, паведамляе «Інтэрфакс» са спасылкай на ГУ МУС па рэгіёне.

Гастарбайтэры, у ліку якіх было маленькае дзіця, жылі проста ў цяпліцах і не змаглі прад'явіць паліцыянтам дакументаў, якія пацвярджаюць законнасць іх знаходжання ў РФ. Усіх затрыманых даставілі ў міграцыйную службу, паведамляюць у абласным паліцэйскім глаўку.

Там падкрэсліваюць, што дадзенае нелегальнае прадпрыемства размяшчалася на плошчы 30 га недалёка ад федэральнай трасы і не магло працаваць незаўважна для мясцовых органаў улады.

Падчас ператрусу там таксама былі знойдзеныя хімічныя рэчывы, небяспечныя для здароўя чалавека, якія кітайцы, верагодна, дадавалі ў глебу для паскоранага паспявання памідораў, якія гадуюцца імі, перадае інфармагенцтва «Волга-Медыя».

На Камчатцы паліцэйскія за мінулы ўік-энд знайшлі 55 мігрантаў-нелегалаў у ходзе рэйдаў на рынкі, будоўлі і асобныя прадпрыемствы ў Петрапаўлаўску, Ялізава і Усць-Бальшарэцку, паведамляе інфармагенцтва «Кам 24» са спасылкай на дадзеныя краявога УМВД.

Большасць парушальнікаў - выхадцы з Узбекістана. Шасцярых затрыманых дэпартуюць з Расеі. Акрамя таго, да адміністрацыйнай адказнасці прыцягнута некалькі прадпрымальнікаў, на якіх працавалі нелегалы, адзначылі ў паліцыі.

Акрамя таго, ва Удмуртыі з 10 жніўня пачаліся рэйды па рынках і будоўлях, накіраваныя на выяўленне нелегальных мігрантаў. Мерапрыемствы будуць доўжыцца да 25 жніўня, «Комсомольская правда».

У Расеі могуць знаходзіцца больш за 10 млн нелегалаў

На гэтым фоне прэзідэнт Федэрацыі мігрантаў Расеі Мухамад Амін Маджумдэр абвясціў, што цяпер на тэрыторыі РФ могуць знаходзіцца больш за 10 мільёнаў нелегальных мігрантаў. Тры мільёны з іх працуюць у Маскве, але легальна - толькі 200 тысяч, такія лічбы ён агучыў у інтэрв'ю «Русской службе новостей».

Корань праблемы Маджумдэр бачыць выключна ў карупцыі сярод чыноўнікаў на месцах. Паводле яго слоў, ужо 10-15 гадоў велізарная колькасць мігрантаў працуе ў ценявым сектары эканомікі, але нажываюцца на гэтым толькі несумленная ўлада і прадпрымальнікі, а дзяржава і народ нічога не атрымліваюць, адсюль і незадаволенасць гастарбайтэрамі сярод мясцовага насельніцтва.