Хэнлан абзавёўся кватэрай і машынай у Менску

Жыць канадскі трэнер хакейнай зборнай Беларусі будзе ў пяці хвілінах хады ад «Менск-Арэны».

Глен Хэнлан з гадавым заробкам у 170 тысяч даляраў прыбыў у Менск. Усё такі ж рыжы і шчаслівы, мяркуючы па выглядзе, Глен у выходныя абжываўся ў арэнднай 3-пакаёвай кватэры, што знаходзіцца ў алімпійскім жылым комплексе на вуліцы Вясёлкавай. Там яго суседзямі будуць знакамітыя спартсмены, у тым ліку і хакеісты, а да «Менск-Арэны» ён можа дайсці ў спакойным тэмпе за 5 хвілін, а то і хутчэй, піша «Комсомольская правда в Беларуси».

Менеджэры, якія ўладжвалі яго побыт, паведамілі, што ніякіх асаблівых патрабаванняў у яго не было. Хіба што машыну папрасіў, каб быць максімальна мабільным. Так што калі ўбачыце Глена на ўласным аўто дзе-небудзь у Жлобіне або Салігорску, не здзіўляйцеся - вы не памыліліся.

Зрэшты, адно цікавае патрабаванне ў яго было - настаўнік рускай мовы. Нешта мы не ўзгадаем, каб раней Глен столькі ўвагі надаваў рускай. Але ўсё зразумела - па кантракце ён 200 дзён павінен знаходзіцца ў Беларусі, а перакладчыка не ўсюды прыставіш.

У панядзелак канадзец ўжо на ўсю моц працаваў у офісе федэрацыі хакея. Жонка з сынам засталіся ў Канадзе і невядома калі прыедуць, так што Глену нішто не перашкаджае акунуцца ў працу з галавой.

Нагадаем, што кантракт у яго на два гады з магчымасцю падаўжэння яшчэ на год. Хоць у выпадку з Гленам загадваць не прыходзіцца... Вы ж памятаеце, як ён у 2009-м з такім жа энтузіязмам павёў за сабой зборную і «Дынама», а ўжо ў кастрычніку апынуўся ў няміласці.

Праўда, па прылёце ў Менск Хэнлан нагадаў, што яго звольнілі з «Дынама», а са зборнай ён сышоў сам. Так што крыўды ў яго не засталося, ды і кіраўніцтва федэрацыі даўно змянілася.

Першы матч пад кіраўніцтвам Хэнлана каманда правядзе ў лістападзе на турніры ў Аўстрыі. Але сядзець склаўшы рукі да гэтага моманту Глен не будзе.

Цяпер ён праглядае апошнія гульні зборнай, у тым ліку і на чэмпіянаце свету. Цікава, што пакуль Глен не прывык да розніцы ў часе, ён папрасіў даць яму ключы ад офіса федэрацыі, каб працаваць па начах. Так і бачыцца самотнае светлае акно, а ў ім - цень клапатлівага Глена, бо спакойна гульні нашай зборнай глядзець немагчыма.

Учора Глен сустракаўся з Аляксеем Калюжным, які на прапанову менскага «Дынама» не пагадзіўся, а новую каманду пакуль не знайшоў.

- Я думаю, ён не проста так даў згоду працаваць, - упэўнены начальнік аддзела нацыянальных каманд Уладзімір Сафонаў. - Ён сапраўды хоча даць вынік. А для гэтага трэба шмат вывучаць, аналізаваць, чым ён зараз і займаецца.