Казахстан не будзе абмяжоўваць увоз прадукцыі Roshen
13- 23.08.2013, 18:07
- 10,370
Камітэт дзяржаўнага санітарна-эпідэміялагічнага нагляду міністэрства аховы здароўя Казахстана не знайшоў фактаў парушэння якасці прадукцыі ўкраінскай кампаніі Roshen.
Пра гэта паведаміў агенцтву «Інтэрфакс-Казахстан» намеснік старшыні камітэта Нуркен Садвакасаў.
«Даследаванне цукерак кандытарскай карпарацыі Roshen скончылася (...). Даследаваныя ўзоры паводле паказчыкаў адказваюць устаноўленым гігіенічным нарматывам. Бензапірэн не выяўлены. У сувязі з тым, што прадукцыі, якая не адпавядае гігіенічным нарматывам, не выяўлена, падставы для ўвядзення мер абмежавання ўвозу прадукцыі Roshen на тэрыторыю Казахстана няма», - удакладніў Садвакасаў.
Нагадаем, напрыканцы ліпеня Расспажыўнагляд забараніў увоз у Расею кандытарскіх вырабаў, пасля таго як у гэтай прадукцыі былі выяўленыя парушэнні паводле нормы ўтрымання тлушчаў і арганалептыкі, а ў некаторых вырабах было выяўлена рэчыва першага класа небяспекі - бензапірэн. Кіраўнік Расспажыўнагляду Генадзь Анішчанка таксама папярэдзіў партнёраў Расеі ў Мытным саюзе аб недапушчальнасці рээкспарту ў Расею прадукцыі Roshen.
Праверку прадукцыі ўкраінскай карпарацыі правялі Казахстан, Беларусь, Малдова і Таджыкістан. Яны заявілі, што прадукцыя адпавядае ўсім патрэбным стандартам якасці.