Януковіч «абгуляў» лепшага тэнісіста Украіны
29- 23.09.2013, 11:26
- 19,022
Прэзідэнт Украіны Віктар Януковіч прадэманстраваў свае навыкі гульні ў тэніс.
Адпаведны сюжэт быў паказаны на тэлеканале «Інтэр».
Сюжэт быў запісаны ў летняй крымскай рэзідэнцыі Януковіча. Сярод яго сапернікаў у парнай гульні апынуўся, у прыватнасці, Аляксандр Далгаполаў - першая ракетка Украіны, які ўваходзіць у топ-40 лепшых тэнісістаў свету. Гэтая партыя засталася за прэзідэнтам, піша Lenta.ru.
Пазней Януковіч, гуляючы ў пары са сваім трэнерам, выйграў у віцэ-прэзідэнта ўкраінскай федэрацыі тэніса Сяргея Лашкулы і былога трэнера зборнай Уладзіміра Багданава, а затым - ужо ў адзіночнай партыі - абыграў уласнага трэнера.
Услед за гэтым прэзідэнт абмяняўся серыяй удараў са згаданым Аляксандрам Далгаполавым. Тэлевядучы Яўген Кісялёў, які падрыхтаваў сюжэт (ён сам пабываў на корце і апынуўся ў ліку тых, хто прайграў Януковічу), назваў гульню кіраўніка дзяржавы ўражлівай, а яго самога - «моцным гульцом аматарскага класа».
Адказваючы пазней на пытанні, прэзідэнт выключыў магчымасць таго, што яму паддаваліся. «Я ні з кім не гуляю, хто паддаецца», - заявіў ён.
Па словах Януковіча, ён захапіўся тэнісам у пачатку 2000-х гадоў. У адной з публікацый, размешчаных на прэзідэнцкім сайце, сцвярджалася, што прэзідэнт у сваёй узроставай катэгорыі «ўваходзіць у дзесятку лепшых гульцоў Украіны». Яго партнёры па корце, як адзначалася, заяўлялі, што ў прэзідэнта «фенаменальнае пачуццё мяча, уменне весці гульню і вялікі арсенал удараў».