Ладуцька даручыў выгнаць менчукоў на азеляненне двароў

Старшыня Менгарвыканкама Мікалай Ладуцька лічыць неабходным больш актыўна прыцягваць насельніцтва да пасадкі дрэў і кустоў.

Пра гэта ён заявіў сёння на аператыўнай нарадзе ў мэрыі, перадае БелТА.

Мікалай Ладуцька адзначыў, што пасадка дрэў і кустоў павінна праходзіць з максімальным удзелам насельніцтва. «Неабходна больш актыўна ўключаць людзей у гэту карысную справу, запрашаць іх да супрацоўніцтва са спецыялізаванымі службамі для папаўнення колькасці дрэў і кустоў, - сказаў ён. - Трэба надаць гэтай працы больш галоснасці, давесці інфармацыю да суб'ектаў гаспадарання, насельніцтва, грамадскіх арганізацый».

Генеральны дырэктар УП «Менскзелянбуд» Ігар Кушнярэвіч адзначыў, што для азелянення сталіцы цяперашняй восенню ўжо нарыхтаваныя саджанцы каля 40 тыс. кустоў і 20 тыс. дрэў (клёны, каштаны, ліпы, ясені). Новыя насаджэнні з'явяцца ў асноўным каля сацыякультурных аб'ектаў, новабудоўляў. Працягваецца праца па вызначэнні дадатковых месцаў для пасадак каля ўстаноў аховы здароўя, сярэдніх школ.

«Пасадкавы матэрыял вырашчаны ў гадавальніку УП «Броўкі Менскзелянбуда», з-за мяжы ён не пастаўляецца. У выпадку недахопу дрэў і кустоў дапамогу ў іх набыцці акажуць лясгасы», - сказаў Ігар Кушнярэвіч.