Сядзіба Ваньковічаў адкрытая толькі для VIP-дэбашыраў

Знакамітая сядзіба Ваньковічаў пакуль адкрытая толькі для VIP-банкетаў, дзе здараюцца бойкі.

У сценах рэстарана-клуба, створанага ў будынку, які з'яўляецца гісторыка-архітэктурным помнікам, ужо некалькі месяцаў праводзяцца раскошныя карпаратывы і вяселлі. Для звычайных наведвальнікаў установа адкрые свае дзверы толькі ў пачатку кастрычніка, піша «Салідарнасць».

Чуткі пра тое, што трапіць у адрэстаўраваную сядзібу Ваньковічаў не так проста, здаваліся непраўдападобнымі хоць бы таму, што праект рэстаўрацыі гісторыка-архітэктурнага помніка курыравала Міністэрства культуры, а сам будынак, па сутнасці, з'яўляецца музеем.

Але, як паказала рэальнае жыццё, жадаючым «з вуліцы» наведаць сядзібу, у якой беларускі мастак Валянцін Ваньковіч правёў дзіцячыя гады, а пазней пісаў свае творы, сапраўды няпроста.

- Вы на закрытае мерапрыемства? Ці так - паглядзець? - пацікавіўся ў суботу ахоўнік на ўваходзе ў парк з акуратнымі дарожкамі да сядзібы Ваньковічаў. - У нас закрытае мерапрыемства сёння.

Аказалася, што сядзіба закрытая на чарговае забаўляльнае мерапрыемства, (па выходных праходзяць рэгулярна). На пытанне, ці можна прайсці ў рэстаран і выпіць, дапусцім, каву, адказваюць: «Рэстаран і бар пакуль не працуюць. Толькі пад заказ і для VIP-кліентаў».

- Меню для звычайных наведвальнікаў пакуль няма, хоць карпаратывы і падобныя мерапрыемствы тут пастаянна, - кажа гаваркі ахоўнік.

Двух прыезджых турыстак ён таксама далікатна «заварочвае». Праўда, дазваляе падысці ненадоўга да альтанцы.

- Вы зразумейце, мы афіцыйна закрытыя. Сядзіба адкрываецца ў пачатку кастрычніка, тады - сардэчна запрашаем.

Пра статус помніка архітэктуры ў сядзібе знакамітага беларускага мастака кажа толькі традыцыйная таблічка - «ахоўваецца законам». На каваным плоце вісяць шыльды на рускай мове: месца, у якое ногі прынеслі турыстаў, называецца «Рэстаран-клуб «Сядзіба».

Рэстаўрацыяй аб'екта ў межах «беларускай Рублёўкі» займалася замежная кампанія «Юніс Ойл», якая належыць бізнесмену Анатолю Цернаўскаму, якога называюць адным з «кашалькоў Лукашэнкі».

- На другім паверсе ёсць невялікая галерэя карцін, і ўсе, у прынцыпе, - дзеліцца ахоўнік. - Затое якое ў нас падсвятленне ўвечары - вы лепш на яго прыходзьце паглядзець! Ды і наогул, вы хіба не ведаеце, што ў 1937 годзе тут было лецішча НКВД, а вы кажаце - музей.

На VIP-банкеце афіцыянты разносілі напоі. Госці дарылі гаспадарам свята кветкі і праходзілі за пачастункамі.

Тым часам ахоўнік «завярнуў» яшчэ двух турыстак, якія жадалі зірнуць на сядзібу мастака. Далікатна запэўніваючы, што 2 або 5 кастрычніка музей і рэстараны адкрыюцца для ўсіх жадаючых.

Зрэшты, мяркуючы па рэлізе, размешчаным на сайце кампаніі, якая займалася рэстаўрацыяй, асноўны ўпор арганізатары робяць не на культуру.

- Гэта ўнікальнае ў сваім родзе месца і адзінае ў Менску, якое абавязкова спадабаецца тым, хто шануе раскошу, любіць адпачываць у самых камфортных умовах і шанаваць добры сэрвіс. Раскоша прасочваецца абсалютна ва ўсіх рэчах. Гасцям «Сядзібы» прапануецца на выбар чатыры залы піўнога рэстарана, два залы з паназіяцкай кухняй, тры залы з беларускай кухняй. Акрамя ўсяго даступная банкетная зала, а таксама летняя тэраса на сто пасадачных месцаў. «Сядзіба» - гэта асаблівы свет, які абавязкова варта наведаць, - выразна дае зразумець адзін з айчынных забаўляльных парталаў аб галоўным прызначэнні «помніка гісторыі і архітэктуры», пра які сціпла напісана на фасадзе знакамітай сядзібы.

VIP-банкеты, якія там ужо былі

Як атрымалася высветліць газеце, у мінулую суботу ў сядзібе вельмі забяспечаная беларуска ажаніла аднаго з двух сыноў. Некаторыя госці вяселля вызначыліся хамскім стаўленнем да персаналу. Акрамя таго, не абышлося без боек і пабітага посуду ў прыбіральні.

- Мы не можам сказаць, чыё вяселле было ў суботу. Гэта канфідэнцыйная інфармацыя, - толькі сказала напярэдадні выхаду публікацыі па тэлефоне адміністратар, дадаўшы, што ўваход для ўсіх наведвальнікаў будзе адкрыты ў рэстаран у пачатку кастрычніка.

14 верасня адбыўся карпаратыў аўтамабільнай кампаніі - Volvo Family Day. Як адзначылі ў сваіх блогах госці, гэты традыцыйнае свята прадстаўніцтва Volvo Trucks у Беларусі арганізоўвае штогод для сем'яў сваіх кліентаў, партнёраў і сяброўскай прэсы.

Фота - з архіву беларускага прадстаўніцтва Volvo Trucks

У жніўні ў сядзібе свой дзень народзінаў з размахам адзначала ўладальніца менскага салона прыгажосці прэміум-класа, бізнесвумэн, якой падабаецца спяваць, Ірына Цярэшчанка.

Дачка касметычнага караля, уладальніка «Беліты»-«Вітэкс» Віктара Цярэшчанкі - Ірыну, якая таксама выступае пад псеўданімам Ітэйра, віншуюць беларуская спявачка Іна Афанасьева і расейскі стыліст-спявак Сяргей Звераў. Фота з сацыяльных сетак