Актывістаў Greenpeace пасадзілі ў мурманскія СІЗА

Следчыя затрымалі па падазрэнні ў пірацтве 30 членаў экіпажа судна Arctic Sunrise.

Актывісты Greenpeace удзельнічалі ў нападзе на нафтавую платформу «Прыразломная» ў Пячорскім моры 18 верасня, але супрацоўнікі ФСБ прадухілілі штурм, паведамляе РБК.

Пасля гэтага карабель эколагаў адканваявалі ў Мурманск, а следчыя распачалі крымінальную справу па артыкуле «Пірацтва, здзейсненае арганізаванай групай». Акрамя таго, СКР западозрыў актывістаў у замаху на ўнутраны суверэнітэт Расеі.

Сёння стала вядома, што следчыя ўжо дапыталі траіх падазраваных па справе. Аднак не ўсе фігуранты змаглі пагутарыць з сілавікамі: у нападзе ўдзельнічалі замежнікі, а таму СКР прыйдзецца знайсці перакладчыкаў, каб правесці допыт. Акрамя таго, замежнікі маюць патрэбу ў паслугах адвакатаў. СКР не жадае дапускаць да абароны адвакатаў, якіх наняла арганізацыя Greenpeace, тлумачачы сваю пазіцыю нормамі КПК.

У адпаведнасці з расейскімі законамі адна і тая ж асоба не можа быць абаронцам двух падазраваных, калі іх інтарэсы супярэчаць адзін аднаму. Пры гэтым следства не выключае, што ў далейшым інтарэсы шэрагу затрыманых сапраўды могуць увайсці ў супярэчнасць.

У цяперашні час актывісты затрыманыя на 48 гадзін, яны знаходзяцца ў розных мурманскіх СІЗА. У бліжэйшы час эколагам прад'явяць абвінавачванні, пасля чаго следчыя змогуць хадайнічаць аб затрыманні актывістаў на больш працяглы тэрмін.

Актывісты Greenpeace выказалі пратэст супраць нафтавага асваення Арктыкі ў Пячорскім моры па-за тэрытарыяльных вод РФ, за межамі так званай небяспечнай для плавання трохмільнай зоны вакол платформы Газпрама «Прыразломная».

Расейскія ўлады засталіся незадаволеныя метадамі барацьбы эколагаў. Так, кіраўнік Мінпрыроды Сяргей Данскі заявіў сёння, што не ўхваляе метады, якія выкарыстоўвае Greenpeace у спробе спыніць працу платформы.

Міністр звярнуў увагу, што расейскія прадстаўнікі Greenpeace уваходзяць у грамадскі савет пры Мінпрыроды і міністэрства актыўна супрацоўнічае з гэтай арганізацыяй на мерапрыемствах.

«Мы не падтрымліваем такога падыходу, калі арганізацыя проста выказвае сваё меркаванне такім агрэсіўным спосабам. Прыводзіць гэта да таго, што мы цяпер і бачым», - адзначыў Данскі.

Фота: AFP