На актывістаў Greenpeace завялі справу аб пірацтве

Супрацоўнікі СК Расеі распачалі крымінальную справу ў дачыненні да актывістаў, якія прарваліся на ледаколе да расейскай нафтавай платформы ў Пячорскім моры.

Пра гэта паведаміў афіцыйны прадстаўнік СКР Уладзімір Маркін. У Greenpeace планы следчых выклікаюць здзіўленне, перадае Russia Today.

«Павінен адзначыць, што да крымінальнай адказнасці будуць прыцягнутыя ўсе асобы, якія здзейснілі напад на платформу, па-за залежнасці ад іх грамадзянства, пры гэтым усе следчыя дзеянні будуць праводзіцца ў строгай адпаведнасці з нормамі расейскага заканадаўства і міжнароднага права», - заявіў ІТАР-ТАСС афіцыйны прадстаўнік следчага камітэта РФ Уладзімір Маркін.

Паводле яго слоў, следчае ўпраўленне СКР па Паўночна-Заходняй федэральнай акрузе ўзбудзіла крымінальную справу па прыкметах злачынства, прадугледжанага арт. 227 КК РФ (пірацтва, здзейсненае арганізаванай групай).

«Як бы там ні было, фактычна такія дзеянні замахваюцца не толькі на суверэнітэт дзяржавы, але і могуць пагражаць экалагічнай бяспецы ўсяго рэгіёну», - адзначыў Маркін.

У Greenpeace лічаць беспадстаўнымі планы расейскага Следчага камітэта прыцягнуць да адказнасці эколагаў, затрыманых за ўдзел у акцыі пратэсту супраць здабычы нафты на платформе «Прыразломная» ў Пячорскім моры. «Гэта выклікае здзіўленне», - сказаў «Інтэрфаксу» ў аўторак кіраўнік расейскага аддзялення Грынпіс, член прэзідэнцкага Савета па правах чалавека Сяргей Цяплянкоў.

Інцыдэнт каля «Прыразломнай»

Судна Arctic Sunrise пад сцягам Нідэрландаў з актывістамі экалагічнага руху Greenpeace на борце было затрымана памежнікамі 18 верасня ў раёне платформы «Прыразломная».

Раней эколагі выказвалі асцярогу ў тым, што праца платформы можа ісці гладка. На іх думку, у выпадку аварыі на платформе магла быць нанесеная значная шкода навакольнаму асяроддзю. Крытыкі праекта казалі пра тое, што бліжэйшыя выратавальныя службы знаходзяцца ў Мурманску.

Актывісты Greenpeace вырашылі наблізіцца да платформы. Як паведаміла памежслужба ФСБ Расеі, судна парушыла правіла марскога суднаходства і нягледзячы на патрабаванні спыніцца, працягвала манеўраваць вакол расейскай свідравой платформы «Прыразломная».

Паколькі капітан адмовіўся кіраваць суднам да прыбыцця спачатку ў Кольскі заліў, а затым у порт Мурманска, карабель прыйшлося ўзяць на буксір.

Як заявілі супрацоўнікі памежнай службы, расейскія ўлады дазволяць экіпажу і эколагам сысці на бераг толькі пасля дбайнай праверкі па факце інцыдэнту каля свідравой платформы.

Фота: AFP