З-за п'янага кіроўцы ў прадпрыемства канфіскавалі пагрузчык за $40 тысяч

У Клецкім раёне суд канфіскаваў у прадпрыемства трактар-пагрузчык «Амкадор», якім паўторна на працягу года кіраваў нецвярозы кіроўца.

«Раніцай 1 лістапада ў аграгарадку Лазовічы Клецкага раёна нарад ДАІ спыніў для праверкі трактар-пагрузчык «Амкадор-332С01», за рулём якога знаходзіўся 43-гадовы слесар машынна-трактарнага парку ААТ «Лазовічы», - паведаміў onliner.by Аляксандр Данільчанка, кіраўнік прэс-службы УУС Менскай вобласці. - Інспектары адчулі моцны пах спіртнога. Кіроўца не адмаўляў, што напярэдадні дапазна выпіваў». Пазней высветлілася, што гэта другі выпадак нецвярозай язды на працягу года. Па законе трактар падлягаў канфіскацыі.

«У той дзень супрацоўнікі ДАІ склалі пратакол аб тым, што трактарыст кіраваў машынай у стане алкагольнага ап'янення, - распавялі ў міліцыі. - Пазней аказалася, што ў канцы траўня мужчына быў аштрафаваны і пазбаўлены правоў на тры гады ў сувязі з тым, што кіраваў гэтым жа трактарам у нецвярозым стане. У той раз ён растлумачыў, што апоўдні 16 траўня выпіў каля шклянкі гарэлкі, пасля чаго сеў за руль».

«Нягледзячы на тое, што пасля пазбаўлення правоў кіроўца быў пераведзены працаваць у машынна-трактарны парк на пасаду слесара, кіраўніцтва ААТ перыядычна прыцягвала яго да кіравання трактарам, - звярнулі ўвагу ва УУС. - Пры далейшым разглядзе высветлілася, што 1 лістапада, калі мужчына ў чарговы раз кіраваў трактарам, адзнака службовай асобы аб яго допуску да кіравання транспартным сродкам адсутнічала. Пракуратурай Клецкага раёна па гэтым факце праведзеная праверка, па выніках якой кіраўніцтву ААТ «Лазовічы» вынесена прадстаўленне, а шэраг супрацоўнікаў прадпрыемства панеслі дысцыплінарныя пакаранні».

«Рашэннем суда Клецкага раёна мужчыне было прызначана пакаранне ў выглядзе папраўчых работ з утрыманнем чвэрці заробку ў даход дзяржавы тэрмінам на два гады і з пазбаўленнем правоў на пяць гадоў, - распавёў Аляксандр Данільчанка. - Закон аб канфіскацыі быў прыняты літаральна за тыдзень да здарэння. Згодна з ім, трактар-пагрузчык «Амкадор» (коштам каля 40 тысяч даляраў), які належыць ААТ «Лазовічы», быў канфіскаваны ў даход дзяржавы. Застаецца адкрытым пытанне аб тым, якім чынам сельгаспрадпрыемства разлічыцца за трактар, набыты ў лізінг і, які, па сутнасці, знаходзіцца ў арганізацыі ў часовым валоданні і карыстанні».

Безумоўна, кіроўцу будзе прад'яўлены грамадзянскі пазоў аб кампенсацыі кошту пагрузчыка, аднак канфіскаваць у вінаватага няма чаго, а сумы, якія адымаюцца з яго, прама скажам, невялікай зарплаты, сур'ёзна ўспрымаць не прыходзіцца. Да таго часу, пакуль кіраўнікі прадпрыемстваў не ўзмоцняць кантроль за транспартнай дысцыплінай сваіх работнікаў, плаціць з уласнай кішэні за канфіскацыю тэхнікі, кошт якой даходзіць да дзесяткаў тысяч даляраў, па факце будуць менавіта яны, адзначылі ва УУС.

Фота: onliner.by