Лаўроў: Сітуацыя ва Украіне выходзіць з-пад кантролю

Масква прапанавала дапамогу Кіеву ва ўрэгуляванні палітычнага крызісу.

Той факт, што апазіцыйныя лідары пачынаюць заклікаць дэманстрантаў супакоіцца, сведчыць аб тым, што сітуацыя з пратэстамі ва Украіне выходзіць з-пад кантролю. Такі пункт гледжання выказаў кіраўнік МЗС РФ Сяргей Лаўроў, выступаючы на выніковай прэс-канферэнцыі піша «Росбалт».

У Маскве «перакананыя, што ўнутраныя праблемы любой дзяржавы, у тым ліку Украіны, павінны вырашацца праз дыялог у канстытуцыйным, прававым полі без умяшання звонку», падкрэсліў кіраўнік расейскага знешнепалітычнага ведамства.

Ён таксама назваў бесцырымоннымі паводзіны некаторых еўрапейскіх палітыкаў у ходзе крызісу ва Украіне. «Мы б аддалі перавагу, каб нашы некаторыя еўрапейскія калегі не вялі сябе так бесцырымонна ў сувязі з украінскім крызісам, калі без якіх-небудзь запрашэнняў члены некалькіх урадаў еўрапейскіх рванулі на Майдан, бралі ўдзел у антыўрадавых дэманстрацыях у краіне, з якой яны маюць дыпламатычныя адносіны. Гэта проста непрыстойна», - сказаў міністр.

Лаўроў лічыць, што менавіта гэта падагравае сітуацыю ва Украіне. «Вы, напэўна, памятаеце, як там усё пачыналася - захоп мэрыі, захоп урадавых будынкаў. У гэтых будынках баевікі трымаліся некалькі тыдняў. Уявіце сабе, што такое адбылося ў любой краіне Еўразвяза. Магчыма гэта? Ды ніколі б гэтага не дазволілі. Зараз пагромы, напады на паліцыю, падпалы, «кактэйлі Молатава», нейкія выбуховыя прылады. Гэта жудасна, гэта абсалютная парушэнне ўсіх еўрапейскіх нормаў паводзінаў», - заявіў кіраўнік МЗС РФ.

Як чакаецца, Дзярждума разгледзіць у сераду праект заявы па сітуацыі ва Украіне.

Нагадаем, прыняцце Вярхоўнай Радай законаў, якія ўжо былі названыя грамадскасцю «дыктатарскімі», выклікала новую хвалю пратэстаў ва Украіне. Пасля дзевятага Народнага веча, якое прайшло 19 студзеня ў Кіеве, мітынгоўцы, сярод якіх былі і радыкальна настроеныя актывісты, пайшлі пікетаваць Вярхоўную Раду, але натыкнуліся на мяжу сілавікоў каля стадыёна імя Лабаноўскага. Пачаліся сутыкненні радыкалаў з сілавікамі. Актывісты сталі падпальваць міліцэйскія аўтамабілі. Тыя ў сваю чаргу ўжылі вадамёты і гумовыя кулі. З абодвух бакоў - дзесяткі параненых. ЗША і ЕЗ заклікалі пачаць перамовы з усімі бакамі, каб вырашыць праблему палітычнага супрацьстаяння, разгледзець патрабаванні пратэстоўцаў і прадухіліць эскалацыю гвалту. Прэзідэнт Віктар Януковіч зноў прапанаваў правесці «круглы стол» з удзелам апазіцыі.