Суд пастанавіў выселіць жыхароў гістарычнага будынка ў Брэсце

Брэсцкі абласны суд адхіліў скаргу жыхароў гістарычнага дома, які мае статус гісторыка-культурнай каштоўнасці, але па рашэнні ўладаў падлягае зносу.

Яшчэ вясной мінулага года камунальныя службы, спаслаўшыся на аварыйны стан дома №10 па вуліцы Астроўскага ў Брэсце, паставілі мясцовых жыхароў перад фактам высялення. Узамен за жылплошчу ў самым цэнтры горада ўладальнікам прыватызаваных кватэр прапанавалі сацыяльнае жыллё на брэсцкай ускраіне - у мікрараёне «Паўднёвы». Такі варыянт задаволіў далёка не ўсіх, і шэраг жыхароў адмовіліся ад перасялення, паколькі былі парушаныя іх правы ўласнікаў, а кошт кватэр, якія прапаноўваліся наўзамен старых, аказаўся зусім неадэкватным.

Пры гэтым жыхары звярталі ўвагу на дзіўны факт: яшчэ ў 2011 годзе брэсцкія ўлады заключылі інвестыцыйную дамову з прыватнай кампаніяй аб продажы гэтага дома, які з'яўляецца гісторыка-культурнай каштоўнасцю, а праз год будынак раптам прызналі аварыйным. Пры гэтым ніякіх абмеркаванняў наконт будучых перспектыў забудовы гэтай тэрыторыі з тымі, хто пражывае ў доме на вуліцы Астроўскага, не было. Як не было і прапаноў ад інвестара цяперашнім уласнікам кватэр паўдзельнічаць у долевым будаўніцтве.

Варта таксама заўважыць, што жыхары самастойна замовілі экспертызу ў незалежнай менскай арганізацыі, якая прызнала стан дома нездавальняючым і зрабіла выснову, што ён патрабуе капітальнага рамонту. Аднак аб неабходнасці разбурэння будынка (на чым настойваюць мясцовыя ўлады) гаворка ў высновах экспертаў не ідзе. Тым не менш, пракуратура і суд першай інстанцыі сталі на бок брэсцкіх уладаў у іх канфлікце з жыхарамі дома, якім пагражае высяленне.

Сітуацыя прыняла зусім ужо абсурдны характар, калі высветлілася, што чыноўнікі хочуць выселіць з кватэр жыхароў, якія ў іх не жывуць. Як ужо паведамляў charter97.org, у жаданні хутчэй дамагчыся свайго прадстаўнікі Брэсцкага гарвыканкама нават не знайшлі час удакладніць, што ў трох кватэрах у цяперашні час зарэгістраваныя і пражываюць не ўласнікі жылля, а члены іх сем'яў.

Акрамя таго высветлілася, што пры разглядзе дадзенай справы суд першай інстанцыі нават не спрабаваў высветліць дату паступлення ў Міністэрства культуры хадайніцтва аб уключэнні дома №10 па вул. Астроўскага ў пералік гісторыка-культурных каштоўнасцяў, зрабіўшы выснову, што гэта здарылася ў 2010 годзе пасля з'яўлення адпаведнай пастановы Савета Міністраў. Аднак на самой справе згаданы дом падлягаў прававой абароне з моманту атрымання Брэсцкім гарвыканкамам апавяшчэння Міністэрства культуры ад 5 траўня 2004 года у якім гаварылася, што пытанне аб уключэнні дадзенага аб'екта ў спіс гісторыка-культурных каштоўнасцяў знаходзіцца ў стадыі рашэння.

Але ўсе гэтыя довады абсалютна не падзейнічалі на калегію па грамадзянскіх справах Брэсцкага абласнога суда, якая разглядаючы касацыйную скаргу жыхароў дома, пакінула ў сіле рашэнне суда першай інстанцыі.