«Белавіі» не стае пілотаў
37- 24.01.2014, 19:06
- 4,155
Генеральны дырэктар «Белавія» Анатоль Гусараў паскардзіўся на нястачу пілотаў.
Ён адзначыў, што цяпер у камандным складзе «Белавія» налічваецца амаль 200 пілотаў, паведамляе БелаПАН.
«У нас нястача пілотаў, але не таму, што ад нас сыходзяць, а таму, што мы развіваем флот, адкрываем новыя маршруты, а палёт кожнага пілота абмежаваны цягам месяца вельмі жорсткімі санітарнымі нормамі», - растлумачыў гендырэктар «Белавія».
Паводле ягоных слоў, амаль 5% ад агульнай колькасці пілотаў складаюць замежныя лётчыкі, у тым ліку з суседняй Украіны, а таксама з некаторых іншых еўрапейскіх краін.
Сярэдні заробак пілота «Белавія» сёння складае 7-8 тыс. даляраў ЗША ў месяц. Напрыклад, як распавёў Анатоль Гусараў, заробак камандзіра экіпажа «Боінга» складае амаль 10 тысяч даляраў. Другі пілот зарабляе 5-6 тысяч даляраў.
Пры гэтым Гусараў падкрэсліў, што вострай нястачы лётнага складу авіякампанія не адчувае. «Больш за тое, амаль сотню чалавек хацелі б сёння ўладкавацца на месца пілота «Белавія», але ім да патрабаванняў пілота нашай авіякампаніі яшчэ расці, расці і расці», - падкрэсліў кіраўнік нацыянальнага авіяперавозніка.
Ён таксама звярнуў увагу, што «Белавія» надае вельмі сур'ёзную ўвагу падрыхтоўцы лётнага складу. Гэта тычыцца як першаснай падрыхтоўкі, так і рэгулярнай праверкі ўзроўню прафесійнага майстэрства пілотаў.