Сафія Ратару: Ніхто не мае права адбіраць жыццё і свабоду
21- 28.01.2014, 9:51
- 5,525
Вядомая спявачка заклікала спыніць гвалт ва Украіне.
Зварот Сафіі Ратару размешчаны на яе афіцыйным сайце.
«Тое, што адбываецца цяпер ва Украіне, не можа не закрануць душу і сэрца кожнага з нас, - лічыць спявачка. - Я да болю абураная тым, што адбываецца ў маёй роднай краіне. У Кіеве пацярпелі і загінулі людзі. Сэрца баліць за кожнага чалавека».
Сафія Ратару заклікала не дапусціць новых ахвяр у супрацьстаянні паміж уладай і апазіцыяй ва Украіне.
«Усе бакі канфлікту абавязаныя пачуць адзін аднаго і знайсці мірнае рашэнне. Нельга дапусціць новыя ахвяры!
Я веру ў розум і здаровы сэнс. Чалавечае жыццё і свабода даражэй за ўсё і ніхто не мае права яе адбіраць. У нас выдатная краіна, працавіты народ. Я хачу міру і шчасця ў кожным доме, кожнай сям'і», - заявіла яна.
Нагадаем, сёння адбудзецца пазачарговае пасяджэнне парламента Украіны. Яно, як разлічваюць многія, можа пакласці пачатак выхаду з палітычнага крызісу. Апазіцыя патрабуе, каб парламент адмяніў скандальныя «законы 16 студзеня», прыняў рашэнні, пасля якіх спыняцца пераследы пратэстоўцаў, разгледзеў пытанні вяртання да Канстытуцыі 2004 года і адстаўку Кабміна.
Штаб нацыянальнага супраціву просіць кіяўлян выйсці на Майдан 28 студзеня ў 12 гадзін.
Па стане на раніцу сённяшняга дня абстаноўка ў сталіцы Украіны спакойная і сутыкненняў паміж дэманстрантамі і сілавікамі няма.