Прададзены першы аўтамабіль, канфіскаваны за п'яную язду

Сёння на аўкцыёне ў гандлёвым доме «Усходні» прададзены першы аўтамабіль, канфіскаваны ў кіроўцы, двойчы за год затрыманага п'яным за рулём.

«Фіят Сціла» 2002 года, дызельны, з аб'ёмам рухавіка 1,9 л, быў выстаўлены на продаж па кошце крыху больш за 28 млн. рублёў. Таргі пачаліся з 29,5 млн. рублёў. У выніку аўтамашыну набыў менчук за 46 млн. рублёў, паведамляюць «Белорусские новости».

Нагадаем, 13 лістапада 2013 года суд Першамайскага раёна Менска прыняў рашэнне аб канфіскацыі аўтамабіля ў 28-гадовага кіроўцы за кіраванне ў стане алкагольнага ап'янення. Гэта быў першы выпадак прымянення арт. 317 прым. КК пасля ўступлення паправак, якія ўзмацняюць жорсткасць адказнасці за кіраванне аўтамабілем у стане алкагольнага ап'янення.

Кіроўца «Фіята» быў спынены на МКАД 27 кастрычніка. Пасля агляду ў крыві ў кіроўцы выяўлена 1 праміле алкаголю. 14 кастрычніка 2013 года ён ужо затрымліваўся за кіраванне аўтамабілем у стане алкагольнага ап'янення. Тады ён быў аштрафаваны і пазбаўлены права кіравання транспартным сродкам.

13 лістапада ў будынку АДАІ Першамайскага раёна Менска адбылося выязное судовае пасяджэнне па гэтай справе. Варта адзначыць, што падсудны цалкам прызнаў сваю віну, што было ўлічана судом пры вынясенні прысуду. Асуджанаму было прызначана пакаранне ў выглядзе 18 месяцаў папраўчых работ з утрыманнем 20% прыбытку ў бюджэт, штрафу ў памеры 300 базавых велічынь (39 млн. рублёў), пазбаўлення правоў на тры гады, а таксама канфіскацыі аўтамабіля «Фіят», за рулём якога знаходзіўся абвінавачаны.

Аўтамабіль, на якім было здзейснена злачынства, зарэгістраваны на іншую асобу.

4 снежня ў прысутнасці журналістаў судовыя выканаўцы суда Першамайскага раёна Менска канфіскавалі «Фіят Сціла» са штраф-стаянкі ў раёне Уручча. Працэдура канфіскацыі машыны са штрафстаянкі ўключала яе вопіс, пагрузку на эвакуатар. «Фіят» быў змешчаны на склад часовага захоўвання. Затым павінна была быць яго ацэнка камісіяй па працы з маёмасцю пры адміністрацыі Першамайскага раёна і выстаўленне на таргі праз ГД «Усходні».

Папраўкі ў заканадаўства, якія робяць больш жорсткай адказнасць за кіраванне аўтамабілем у стане алкагольнага ап'янення, уступілі ў сілу 24 кастрычніка. За паўторнае на працягу года кіраванне ў нецвярозым выглядзе цяпер прадугледжаная спецыяльная канфіскацыя транспартнага сродку па-за залежнасці ад таго, належыць ён кіроўцу ці не.

Стала больш жорсткай адказнасць за язду ў нецвярозым выглядзе - штраф зараз складзе да 100 базавых велічынь. А артыкул 317 КК (парушэнне правілаў дарожнага руху або эксплуатацыі транспартных сродкаў) прадугледжвае пры здзяйсненні ДТЗ у стане алкагольнага ап'янення, што прывяло да смерці чалавека або нанясення цяжкага цялеснага пашкоджання, пазбаўленне волі на тэрмін да сямі гадоў, смерць дзвюх і больш асоб - пазбаўленне волі на тэрмін ад пяці да дзесяці гадоў.