Расея хоча захапіць частку Арктыкі памерам з Егіпет
16- 29.10.2014, 20:38
- 12,507
Расея падасць заяўку ў ААН на пашырэнне межаў арктычнага шэльфа вясной 2015 года.
Пра гэта напярэдадні на ўрачыстай сустрэчы навукова-экспедыцыйнага судна "Акадэмік Фёдараў" у Санкт-Пецярбургу заявіў міністр прыродных рэсурсаў і экалогіі РФ Сяргей Данскі, паведамляе ТАСС.
Расея прэтэндуе на далучэнне 1,2 млн. кв. км тэрыторыі шэльфа ў Паўночным Ледавітым акіяне. Сяргей Данскі сказаў, што гэта дазволіць павялічыць патэнцыйныя запасы вуглевадародаў на 5 млрд. тон умоўнага паліва. "Але гэта мінімальныя ацэнкі, я ўпэўнены, што лічба будзе большай", - падкрэсліў міністр РФ.
"Для нас, для міністэрства, гэты дзень быў доўгачаканым, таму што папярэднічала вялікая работа. Заяўку на наш шэльф, нашыя арктычныя межы мы будзем падаваць у ААН вясной наступнага года", - сказаў ён.
Паводле ягоных слоў, "экспедыцыяй выкананы ўвесь аб'ём работ, нават больш, чым планавалася. У нас зараз ёсць усе неабходныя абгрунтаванні, каб рыхтаваць заяўку і ўнесці яе на камісію па межах кантынентальнага шэльфа. У нас ёсць поўны аб'ём навуковых звестак, каб далей працаваць з лепшымі геолагамі арктычных краін, якія ўваходзяць у склад камісіі".
Прадаўжэнне мацерыка
Навуковая экспедыцыя на судне "Акадэмік Фёдараў" вызначэння знешніх межаў кантынентальнага шэльфа (ВГКШ-2014) пачалася 10 ліпеня. У навуковы склад экспедыцыі ўвайшлі супрацоўнікі "Марской арктычнай геалагічнай экспедыцыі".
У рамках дзяржаўнага кантракту з Федэральным агенцтвам недракарыстання ВГКШ-2014 былі праведзеныя комплексныя даследаванні з мэтай стварэння геолага-геафізічнай асновы для ацэнкі перспектыў нафтагазаноснасці кантынентальнага шэльфа за межамі выключнай эканамічнай зоны РФ у Паўночным Ледавітым акіяне. Плошча даследавання склала 350 тыс. кв. км. Вынікі даследаванняў дазволяць дапоўніць першапачатковую заяўку Расеі, пададзеную ў Арганізацыю Аб'яднаных Нацый у 2001 годзе.
Каб ААН у асобе Камісіі межаў кантынентальнага шэльфа прызнала права Расеі на гэтыя тэрыторыі, неабходна навукова даказаць, што яны з'яўляюцца шэльфам, то есць працягам мацерыковай зямной кары, звязаным з ёй агульнай геалагічнай будовай. "Я ўпэўнены, што гэта наш шэльф. Усе спецыялісты кажуць, што ў нас вельмі добрая заяўка. Прыняцце заяўкі камісіяй - гэта практычна прыняцце нашай геалагічнай мадэлі іншымі спецыялістамі геалагічных службаў арктычных краін", - адзначыў Данскі.
Плюсы пашырэння
Змяненне межаў у Арктыцы дазволіць павялічыць плошчу краіны ў раёне Паўночнага Ледавітага акіяна на 1,2 млн кв. км. На гэтай тэрыторыі размешчаныя запасы прыродных рэсурсаў у аб'ёме 5 млрд. тон умоўнага паліва, заявіў Данскі.
"З улікам праведзеных даследаванняў у адпаведнасці з графікам нашая арктычная заяўка па рашэнні ўрада будзе накіраваная ў Камісію межаў кантынентальнага шэльфа. Адабрэнне расейскай заяўкі замацуе за Расеяй суверэнныя правы на дадатковую тэрыторыю плошчай 1,2 млн. кв. км у Паўночным Ледавітым акіяне. Гэта дазволіць таксама павялічыць прагноз на вуглевадародныя рэсурсы на 5 млрд тон умоўнага паліва", - сказаў Данскі.
Паводле ягоных слоў, заяўка на арктычны шэльф у ААН - "гэта заяўка на нашую будучыню, на нашае ўстойлівае развіццё ў Арктычным рэгіёне".
Як паведамлялася, за Палярным кругам размяшчаецца каля 60 буйных вуглевадародных радовішчаў, з іх 43 - у расейскім сектары. Сумарныя вымаемыя рэсурсы Расейскай Арктыкі ацэньваюцца ў 106 млрд. тон нафтавага эквіваленту, запасы газу - у 69,5 трлн. кубаметраў.