«Белнафтахім» пачаў прадаваць на АЗС зімовае дызпаліва

Аўтазаправачныя станцыі сістэмы канцэрна «Белнафтахім» пераходзяць на рэалізацыю зімовага дызельнага паліва.

Пра гэта сайту charter97.org паведамілі ў прэс-службе канцэрна.

«Зімовае дызпаліва паступае на АЗС рэспублікі ўжо з сярэдзіны кастрычніка, аднак для таго, каб яно цалкам замяніла летняе, неабходны пэўны час», - растлумачылі ў «Белнафтахіме». Дызельнае паліва класа «Арктыка», якое можна выкарыстоўваць пры тэмпературы мінус 32 градуса Цэльсія і вышэй, будзе пастаўляцца на запраўкі пазней, зыходзячы з умоў надвор'я.

Аўтаўладальнікам таксама парэкамендавалі пры змене летняга варыянту паліва цалкам яго выдаляць, паколькі пры змешванні рэшткі пагаршаюць паказчыкі фільтруемасці.

Беларускія нафтаперапрацоўчыя заводы (ААТ «Мазырскі НПЗ» і «Нафтан») з 15 кастрычніка перайшлі на вытворчасць зімовага дызельнага паліва гатунку F, якое мае гранічную тэмпературу фільтруемасці не вышэй за мінус 20 градусаў Цэльсія.