Парэчанкаву забаранілі ўезд на тэрыторыю Латвіі

Міністэрства замежных спраў Латвіі ўнесла акцёра Міхаіла Парэчанкава ў спіс асоб, якім забаронена ўязджаць у краіну.

Пра гэта ў суботу, 1 лістапада, паведамляе РІА «Навіны».

«Латвія паслядоўна будзе прадаўжаць сваю палітыку ў дачыненні да тых, хто сваім учынкам падрывае прынцыпы міжнароднага права. Парэчанкава не чакаюць у Латвіі», - сказаў кіраўнік МЗС Эдгарс Рынкевіч.

МЗС Латвіі ў ліпені забараніў уезд у краіну Алегу Газманаву, Іосіфу Кабзону і спявачцы Валерыі з прычыны іх пазіцыі ў акупацыі Крыма Расеяй. Персонай нон-грата ў кастрычніку стаў і акцёр Іван Ахлабысцін.

Скандал з удзелам Парэчанкава адбыўся пасля таго, як у інтэрнэце з'явілася відэа, на якім акцёр у касцы з надпісам «Прэса» вядзе стральбу з кулямёта. Як высветлілася, ён прыбыў у самаабвешчаную «Данецкую народную рэспубліку» 30 кастрычніка на прэзентацыю новага фільма «Паддубны», у якім выканаў галоўную ролю. У той жа дзень акцёр наведаў аэрапорт Данецка, дзе і пастраляў з кулямёта.