ЗША заяўляюць аб «абуральным» парушэнні Менскіх дамоўленасцей
8- 10.11.2014, 9:37
- 6,635
Афіцыйны Вашынгтон выказаў сур'ёзную занепакоенасць у сувязі з узмацненнем вайсковай актыўнасці на тэрыторыі усходу Украіны, акупаванай баевікамі.
Пра гэта гаворыцца ў апублікаванай у нядзелю заяве прадстаўніка Рады нацыянальнай бяспекі ЗША Бернадэт Міхана, паведамляе «Укринформ».
«Мы вельмі занепакоеныя актывізацыяй баявых дзеянняў ва Усходняй Украіне, а таксама шматлікімі паведамленнямі, у тым ліку, ад Спецыяльнай назіральнай місіі АБСЕ, што сепаратысты, якіх падтрымлівае і забяспечвае Расея, перасоўваюць вялікія калоны цяжкага ўзбраення і танкаў на пярэдні край канфлікту», - адзначаецца ў дакуменце.
Пры гэтым, гаворыцца далей, Злучаныя Штаты надалей заклікаюць усе бакі строга выконваць пагадненні аб спыненні агню. «Любая спроба сепаратыстаў захапіць дадатковую тэрыторыю ва ўсходняй Украіне будзе абуральным парушэннем Менскіх дамоўленасцей», - адзначылі ў Вашынгтоне.
«Мы паўтараем наш заклік да Расейскай Федэрацыі паважаць ўсе дамоўленасці, дасягнутыя ў Менску, у тым ліку аб спыненні вайсковай падтрымкі сепаратыстаў і вывадзе ўсіх сваіх войскаў і ўзбраенняў з Украіны», - заявіў прадстаўнік Рады нацбяспекі ЗША.
Акрамя таго, падкрэсліла яна, Расея павінна забяспечыць магчымасць аднаўлення суверэнітэту Украіны, усталяванне кантролю на расейска-украінскай мяжы з боку АБСЕ, а таксама вызваленне ўсіх закладнікаў.
«Мы надалей падкрэсліваем, што захаванне рамак Менскага пагаднення з'яўляецца лепшым шанцам дасягнуць мірнага ўрэгулявання канфлікту ва ўсходняй Украіне», - адзначыў прадстаўнік Рады нацбяспекі ЗША.