Еўразвяз: РФ павінна вывесці войскі з Украіны
7- 10.11.2014, 10:12
- 7,826
Еўрапейскі Звяз заклікае Расею вывесці свае войскі з тэрыторыі Украіны.
Пра гэта гаворка ідзе ў заяве вярхоўнай прадстаўніцы ЕЗ у замежных справах і палітыцы бяспекі Федэрыка Магерыні, паведамляе «Украинская правда».
«Вельмі важна не дапусціць паўторнага абвастрэння вайсковых дзеянняў. Усе бакі павінны прадэманстраваць максімальную стрыманасць, строга выконваць свае абавязанні ў рамках Менскага пратаколу і мемарандума і пачаць канструктыўны дыялог у пошуку мірнага развязвання канфлікту. Пошук павінен быць заснаваны на павазе незалежнасці, суверэнітэту і тэрытарыяльнай цэласнасці Украіны», - адзначаецца ў заяве Магерыні.
«Я заклікаю Расейскую Федэрацыю цалкам выконваць свае абавязанні ў гэтым сэнсе, у тым ліку - шляхам спынення далейшага перамяшчэння зброі і вайскаў на тэрыторыі Украіны, а таксама забраць усе войскі, зброю і рыштунак, якія знаходзяцца пад яе кантролем з тэрыторыі Украіны», - гаворыцца ў заяве.
Пры гэтым вярхоўная прадстаўніца ЕЗ заклікала Расею паўплываць на тэрарыстаў, каб яны прытрымліваліся ўмоў пагаднення, заключанага ў Менску.
Раней кіраўнік МЗС Літвы Лінас Лінкявічус заявіў: Еўразвяз павінен зрабіць больш жорсткім санкцыі супраць Расейскай Федэрацыі.
«АБСЕ пацвярджае, што расейскія танкі ўдзельнічаюць у баявых дзеяннях на Данбасе. Вось вам і давер да Расеі і імкненне да дыялогу. Санкцыі ЕЗ павінны быць узмоцненыя», - заявіў ён.
Як вядома, прадстаўнікі місіі АБСЕ ва Украіне ў сваім дакладзе аб сітуацыі на ўсходзе заявілі, што ў Данецку і Макееўцы зафіксаваныя калоны цяжкай тэхнікі і танкаў.
Перасячэнне ўкраінскай мяжы падмацаваннем з РФ было зафіксаванае таксама 6 лістапада. Тады фармаванні сепаратыстаў атрымалі з Расеі падтрымку вайскоўцамі і ўзбраеннем, у тым ліку - 32 танкі і самаходныя артылерыйскія ўстаноўкі.
У сваю чаргу ў NATO канстатавалі павелічэнне колькасці расейскіх войскаў на мяжы з Украінай.
«Калі факт перасячэння мяжы пацвердзіцца, гэта будзе яшчэ адным довадам агрэсіі Расеі і прамой уцягнутасці ў дэстабілізацыю сітуацыі ва Украіне», - заявіў прадстаўнік Альянсу.