Расейская апазіцыя рыхтуе ў Маскве новую акцыю пратэсту

Яна можа адбыцца да канца года.

Пра гэта паведамляе «Інтэрфакс» са спасылкай на прадстаўніка руху «Салідарнасць» Пятра Царкова. Дакладная дата правядзення мерапрыемства яшчэ не вызначаная.

Са слоў Царкова, у выпадку калі апазіцыя прыме канчатковую пастанову правесці акцыю ў сталіцы, яна будзе ўзгодненая з мэрыяй. «Да канца года, хутчэй за ўсё, такая акцыя будзе праведзеная. Цяпер гэта пытанне абмяркоўваецца «Камітэтам пратэстных дзеянняў», - сказаў ён.

Яшчэ адзін актывіст «Салідарнасці» Сяргей Давідзіс адзначыў, што сярод магчымых тэм будучай акцыі эканамічная сітуацыя ў Расеі, а таксама становішча ва Украіне, піша Lenta.ru. «Сітуацыя ў грамадстве і вакол Расеі такая, што нейкая грамадская рэакцыя можа быць запатрабаваная», - сказаў ён.

Папярэдняя буйная акцыя «Камітэта пратэстных дзеянняў», які аб'ядноўвае некалькі апазіцыйных арганізацый, адбылася ў Маскве 21 верасня. Тады апазіцыянеры зладзілі шэсце па бульварах ад Пушкінскай плошчы да праспекта Сахарава.