Першая дэкада лістапада была анамальна цёплай
- 10.11.2014, 16:16
- 5,666
Сярэднясутачная тэмпература паветра склала 5,6°С, што на 3,6 градуса цяплей за кліматычную норму.
Пры гэтым выпала ўсяго 5 мм ападкаў, або 31% дэкаднай нормы. Пра гэта карэспандэнту агенцтва «Менск-Навіны» распавяла галоўны сіноптык Рэспубліканскага гідраметэацэнтра Святлана Рыбакова.
У сталіцы 6-7 лістапада былі пабітыя тэмпературныя рэкорды для гэтых дзён. Так, 6 лістапада перакрыты рэкорд 84-гадовай даўніны, калі слупкі тэрмометраў дасягнулі адзнакі 12,4°С. Цяперашні ж дзень 6 лістапада стаў яшчэ цяплейшым, паветра прагрэлася да +14,5°С.
7 лістапада таксама абноўлены тэмпературны максімум 60-гадовай даўніны. У 1954 г. у гэты дзень было 12,5°С, а 7 лістапада 2014-га слупкі тэрмометраў падняліся да 14,6°С. Але абсалютны рэкорд месяца не пабіты. У Менску самым цёплым лістападаўскім днём за ўсю гісторыю метэаназіранняў застаецца 1 лістапада 1926 года, калі дзённая тэмпература паветра дасягнула +16°С.
Да канца гэтага тыдня тэмпературны рэжым прыйдзе ў адпаведнасць з кліматычнай нормай, адзначыла сіноптык.